Progreso den turismo mester refleha den bienestar di nos pueblo

Presidente di Comision di Turismo, Jennifer Arends-Reyes:

ORANJESTAD (AAN): Parlamentario Jennifer Arends-Reyes, presidente di Comision di Turismo di Parlamento di Aruba, a enfatisa cu e progreso di turismo mester traduci den oportunidad y bienestar pa e pueblo di Aruba. El a expresa esaki durante e reunion rutinario di e comision cu Aruba Tourism Authority (ATA), den cuadro di e aña parlamentario nobo.

Durante e encuentro, Arends-Reyes y su coleganan parlamentario a ricibi un presentacion tocante e estado actual di turismo na Aruba. E intercambio a ofrece parlamento informacion actualiza pa sigui e desaroyonan den e sector y cumpli cu su responsabilidad di evalua e rumbo di turismo y haci e preguntanan necesario.

“Nos kier un turismo cu ta trece bienestar pa Aruba y su pueblo. Esaki ta nifica cu, ademas di e cifranan, nos mester wak con e desaroyo di e sector ta contribui na calidad di bida, oportunidad di trabou y crecemento di nos empresarionan local,” Arends-Reyes a expresa.

Segun e parlamentario, turismo ta toca hopi aspecto di bida diario na Aruba. P’esey, e evaluacion di su progreso mester inclui con e sector ta crea oportunidad pa empleadonan, empresarionan local y hobenan cu kier construi un futuro den turismo. Na mes momento, e crecemento mester tuma luga cu atencion pa proteccion di nos naturaleza, capacidad di nos infrastructura y calidad di bida den nos barionan.

Como presidente di Comision di Turismo, Arends-Reyes a destaca e importancia di mantene un dialogo continuo cu ATA y e diferente partinan envolvi den e sector. Informacion actualiza y un intercambio constante ta esencial pa identifica retonan, evalua oportunidadnan y determina cua asuntonan ta merece mas atencion di parlamento.

“Nos hendenan ta e curason di nos turismo. Nan dedicacion, hospitalidad y talento ta contribui na e experiencia cu nos bishitantenan ta aprecia. P’esey, e bienestar di nos pueblo mester keda central den e rumbo cu nos ta sigui,” el a subraya.

Arends-Reyes lo sigui duna siguimento na e desaroyonan den turismo y traha pa un sector fuerte, cu ta contribui na un Aruba prospero y cu su logronan ta refleha den bida di nos pueblo.