Motociclista herida gravemente den accident semi-frontal na Palm Beach

Auto cu a ocasiona accident a trata na huy

• Situacion di victima ainda ta critico 

ORANJESTAD (AAN): Riba Diasabra anochi por a nota cu tin hopi Motorcycle y tambe Bikes riba cayanan di Aruba.  Ta fin di luna tambe, pues hopi hende moviendo rond den e bida nocturno.

   Pero banda di 9:45 pm riba caminda di Noord pa Palm Beach, net na entrada di Citgo Palm Beach como tambe salida di Palm Aruba Condos net ora motorcycle ta bayendo direccion pariba, un auto compacto Kia Picanto color blanco ta biniendo di direccion contrario, y e chauffeur di e auto a core mucho na su man robez.

   Consecuencia di esey ta cu un impacto a socede semi-frontal entre e motorcycle y e auto.  E pia di e motociclista a bay dal fuerte den e bumper y e wantalodo, como tambe wiel dilanti banda robez di e auto, y su curpa a dal contra e spiel pafo, y ranca esaki.

    E impacto tabata fuerte, y inmediatamente e motociclista a cay abao ta sclama di dolor, y tabata bisto cu su pianan a haya heridanan grave, y tabata mustra di ta un fractura complica.  Demas motociclista coriendo eybanda a core baha pa cuminza bati alarma.  E chauffeur y ocupante di e Kia Picanto na prome instante tambe a stop, a cende nan hazard-lights, y bay check e situacion.

   Otro hendenan a hisa e motorcycle y pone riba su side-step, y tabata wardando yegada di Polis y Ambulans.  E persona abao tabata keda sclama di dolor, y heridanan tabata sangra profusamente.

   Pero inesperadamente, a tuma nota cu tanto e chauffeur di e Kia Picanto, y su pasahero a subi nan auto, start esaki y cuminza move bay.  Tabata bisto cu e hendenan aki no kier a keda eynan y a move.  Siendo cu tabatin multitud di hende eybao cu a mira loke a socede. Algun motociclista cu a nota esaki, mesora a bay nan tras pa keda raporta na Polis unda e duo aki ta moviendo.

   E auto a sigui bay pabao pa rotonde di Palm Beach, unda el a subi Avenida Orlando Oduber bay direccion panort.  E motociclistanan a sigui nan tras y tabata grita e chauffeur pa e stop, pero nan no a haci caso, y algun biaha a hasta bira e stuurwiel pa purba di dal y benta e motociclistanan aki abao.  Mientras tanto ta yamando Polis pa raporta loke ta pasando cu e homber cu a ocasiona e Hit & Run.

   Casi yegando na Sarah Quita Beach, e chauffeur di e Kia Picanto a bay staciona e auto un tiki scondi patras di un casita di Fisherman’s Huts, baha y bay sinta banda di beach ta bebiendo.

   Polis a yega, a topa cu e Kia Picanto color blanco cu number A-64754, y a haya e dos hendenan sinta ta bebe manera nada un pasa.  Chauffeur di e Kia Picanto a wordo deteni y hiba warda di Polis.  E persona aki tabatin caracteristica di ta bao influencia, y pa colmo e no tin rijbewijs tampoco.  Takelwagen a bay busca e auto cu a wordo confisca pa investigacion.

   E accident mes: Den e accident, e Kia Picanto coriendo demasiado lo pasa haak e pia robez di e motociclista di inicial A.  Segun amigonan e motociclista A. a perde masha hopi sanger eybao, casi bay den shock, y tabata sclama di dolor.   Algun hende a yega cu pida paña pa purba na reduci e sangramento.

   Paramediconan cu a yega, a mira seriedad di e victima, y a trata na stabiliza e curpa eybao mes, pa purba stop e sangramento profuso.  Unabes cu a logra esey nan a pone den Ambulance, y cu urgencia a ser transporta pa Servicio di Emergencia na Hospital HOH.

   Aki a manda busca specialista pa asina haci operacion mesora.  Vocero di Polis a indica cu e condicion di e motociclista aki ta critico, y a wordo interna den Unidad di Intensive Care.

   Mientras tanto e anochi aki a bira mas druk, debi cu Polis a cera e caminda aki di ambos banda.  Departamento di Trafico di Polis a cuminza cu investigacion, y papia cu testigonan.

    Te na ciere di edicion aki di DIARIO, e motociclista ta keto bay den ICU den situacion critico.