ELMAR ta haci un donacion di computers na EPB San Nicolas

Den cuadro di nan colaboracion continuo

ORANJESTAD (AAN):  Na comienso di aña, EPB San Nicolas a forma parti di Engineers Week di ELMAR, unda studiantenan a haya oportunidad pa conoce e sector di energia y e diferente profesionnan den e industria.

Awor, como continuacion di e colaboracion, ELMAR a haci un donacion di computers pa contribui na e recurso y facilidadnan cu ta apoya e studiantenan den nan desaroyo. Cu e paso aki, ELMAR ta sigui fortalece su relacion cu EPB San Nicolas y crea oportunidadnan pa conecta educacion cu energia, tecnologia y e mundo profesional.

ELMAR a haya un tour tambe di e facilitadnan di EPB San Nicolas, unda nan a conoce mas di e Unit di Elektrotechniek y e Unit di Information and Communications Technology (ICT). E bishita a duna nan un miho perspectiva riba e ambiente di e scol y e diferente areanan den cual studiantenan ta wordo prepara pa nan futuro profesional.

Pa ELMAR, colaboracionnan ta importante pa trece educacion y mundo profesional mas cerca di otro, mientras ta contribui na e desaroyo y futuro di nos hobennan y studiantenan.

ELMAR a keda impresiona cu e entusiasmo y dedicacion di e scol, y ta desea tur studiante y maestro un aña escolar exitoso, yen di oportunidadnan nobo y crecemento.