Gobierno a firma areglo di deposito cu SVb pa baha costo di financiamento

Ministro Geoffrey Wever:

• Asina sigui reduci debe di Aruba 

ORANJESTAD (AAN): Minister di Finansa, Asunto Economico y Sector Primario Geoffrey Wever ta anuncia cu riba 14 di september 2026 Gobierno di Aruba a formalisa un “depositoregeling” cu Sociale Verzekeringsbank (SVb) na un balor di Afl. 50 miyon Florin y na un interes di 3 porciento.   Formalisacion di e areglo aki ta forma parti di Gabinete AVP-FUTURO su maneho di financiamento y reduccion di debe di Pais Aruba.

   E Depositoregeling no ta un un instrumento financiero nobo. Desde 1 di januari 2024 e Landsverordening Aruba tijdelijk financieel toezicht (LAft) ta duna gobierno e posibilidad aki. Despues cu gobierno anterior a entrega e cambio di ley di supervision, Parlamento di Aruba a trata y aproba e cambio aki y asina ancra legalmente normanan nobo pa finansa publico sostenibel y reduccion structural di debe.

   E cambio aki ta implica cu den caso SVb y AZV como parti di sector colectivo no tin debe propio, nan surplus por wordo uza pa baha debe di Pais Aruba. Esaki por tuma luga, entre otro, den forma di deposito(depositoregeling)  cerca Pais Aruba of mediante tene papel di tesoreria (schatkistpapier) den nan portofolio. E areglo cu SVb firma riba 14 di september 2026 ta duna contenido practico y concreto na e posibilidad legal aki. Un posibilidad legal cu e gobierno y parlamento a crea.

  Colegio di supervision financiero di Aruba (CAft) a recomenda na diferente ocasion pa gobierno haci uzo di suprlusnan den sector colectivo pa reduci debe di Pais Aruba. Den consehonan publico, CAft a recomenda na varios ocasion pa gobierno yega yega mas pronto posibel na acuerdo cu AZV y SVb pa asina nan surplus por wordo usa pa paga debe. Segun CAft, esaki ta permiti Aruba presta menos, baha e presion di gastonan di interes y crea mas espacio presupuestario pa futuro gastonan necesario y inversionnan. Aunke cu CAft a recomenda esaki repetidamente na Aruba, gobierno anterior no a traha ningun afspraak ni a laga ningun plan concreto atras. Aunke e gobierno anterior mes a trece e cambio aki den ley di supervision, e gobierno anterior no a haci uzo di e instrumento financiero ancra den ley.

   Mirando cu ley ta duna gobierno e posibilidad pa haci uzo di surplus di SVb, Gabinete AVP-Futuro a opta pa transforma e posibilidad legal y e recomendacionnan aki den accion concreto. Como parti di e proceso, Gabinete AVP-Futuro a pidi CAft su conseho riba esaki. Den su conseho di 16 di juli 2026, CAft a califica e financiamento via SVb como un “bon prome paso” pa, conforme su recomendacionnan anterior, usa surplusnan di fondonan social pa reduccion di debe. CAft a señala tambe cu esaki ta contribui na un financiamento mas eficiente di sector colectivo y por resulta den un reduccion substancial di costo di financiamento.

   Conforme e acuerdo, SVb ta deposita Afl. 50 miyon cerca Pais Aruba pa un periodo di 36 luna, contra un interes di 3% pa aña. Na final di e periodo acorda, Pais mester paga e suma principal completamente bek na SVb. Esaki no ta nifica cu fondo di SVb ta wordo transferi gratuitamente na Gobierno. Durante henter e periodo SVb ta mantene un derecho financiero contra Pais Aruba, ta ricibi interes riba e suma deposita y na vencimento ta haya e capital bek.

   E areglo ta contene tambe garantia pa proteha posicion financiero di SVb y pa asegura cu e institucion por sigui cumpli cu su obligacionnan legal. E suma deposita ta parti di un surplus temporal cu, conforme e acuerdo, no ta necesario pa cubri prestacionnan y gastonan di ehecucion durante e proximo tres añanan fiscal. Esaki tambe ta e factor determinante pa kico SVb a bay di acuerdo cu e areglo aki.

   Gobierno ta enfatisa cu e deposito no ta crea ningun debe nobo ni espacio financiero extra pa haci gastonan nobo. E deposito di Afl. 50 miyon ta por lo tanto un di e instrumentonan pa cubri e necesidad di financiamento ya aproba pa Parlamento, y no un financiamento adicional riba esaki. E suma aki tampoco ta wordo uza pa gasto di maneho adicional. E financiamento ta trata refinanciamento di debe publico cu ta vence, un practica cu gobierno anterior tabata haci.

Den su conseho di 16 di juli 2026 CAft a confirma cu e fondo ta wordo usa pa paga obligacionnan estatal cu ta vence y cu esaki ta cay dentro di e necesidad di financiamento den Presupuesto 2026 aproba pa Parlamento.

   “E meta no ta solamente pa financia debe cu ta vence, sino pa haci manera ta ancra den ley, haci esaki na un manera mas eficiente y contra condicionnan mas favorable pa Pais. Menos gasto di interes ta significa menos presion riba presupuesto publico y, na termino, mas espacio pa prioridadnan di Aruba” segun minister di Finansa Geoffrey Wever.

   Cu e areglo di deposito firma riba 14 di september 2026, Gabinete AVP-Futuro ta pone den practica un posibilidad cu Parlamento mes a ancra den LAft y cu CAft a recomenda repetidamente: usa fondo temporalmente disponibel dentro di sector colectivo di un manera responsabel, contra remuneracion y cu garantia pa e fondo social, mientras Pais por refinancia su debe na un costo mas abao. Asina, Gobierno ta sigui cu un maneho dirigi na reduccion structural di debe, menor costo di interes y finansa publico mas sostenibel pa Aruba.

   Esaki den linea cu Programa di Gobernacion AVP-Futuro riba pagina 18: pa un finansa publico duradero Lo cumpli cu normanan di presupuesto ancora den e Landsverordening Aruba Financieel Toezicht y lo keda continuamente trata na mehora e normnan den bienestar di finansa publico di Aruba

Como parti di ehecucion di Gabinete AVP-Futuro su maneho financiero, mininster di Finansa Geoffrey Wever a manda informa Parlamento riba e areglo di deposito firma entre gobierno y SVb. Parlamento tambe a ricibi un copia di e areglo di deposito cu SVb y copia di CAft su conseho riba esaki.