Pista di Palo Marga lo bay haya un toren nobo

Groundbreaking tabata Diasabra anochi

• Esun di 43 aña bieu lo wordo basha abao 

ORANJESTAD (AAN): Ministerio di Deporte den su coordinacion pa yuda tur disciplina di Deporte, ta keda uni forza cu Lotto pa Deporte pa asina tin placa pa keda mantene tur facilidadnan deportivo y sigui inverti pa mehora unda cu por.  Esey ta loke Ministro Gerlien Croes a declara Diasabra anochi durante un ceremonia na International Raceway Park Palo Marga.  E momento ey e lugar tabata yen di hende pa mira e competencianan di One Cool Summer 2026.  Tabatin participantenan di Aruba, demas islanan ABC, y tambe di Puerto Rico presente na e actividad.

   Durante un pausa, a dicidi na haci un acto oficial y Ministro Croes a splica cu di aña pasa caba a pone den Presupuesto di Ministerio di Deporte pa 2026, pa haci un inversion na e pista di Palo Marga. 

   President di ABM Motorsports a bisa cu ta bay haya un Toren nobo pa e pista, y e ta un logro grandi, pasobra di hopi tempo ta planeando esaki.  For di tempo cu a acerca Ministro riba e deseo aki, el a keda cu esaki den mente.

   Diasabra anochi a tene e ceremonia di ‘groundbreaking’ di e Toren nobo.  A duna gradicimento na Ministro Gerlien Croes, tambe e conocido gran amante y coordinador di drag race na Aruba, esta Joy Werleman.

   Werleman a splica cu e Toren existente ya tin 43 aña cu el a wordo construi, y awor si su funcion a yega na su final.  A ricibi conseho serio di tanto Departamento di DTI y tambe Gobierno, pa asina reemplaza e Toren aki.

   Ta mira cu e esfuerzo di Gobierno aki ta sigui empuha e deporte aki.  Segun Werleman, e Toren nobo lo wordo construi na e lugar unda originalmente e mester a ser lanta.  E Toren nobo lo bin banda pazuid.  Y esun existente lo wordo basha abao, y na su lugar lo bin Tribuna nobo, y aki Joy Werleman a hari un tiki y sugeri cu kizas e ta bira un Tribuna pa VIP.

   El a agrega cu e Toren nobo lo tin espacio pa personal di ‘Control Tower’, un booth pa persona cu ta anuncia caredanan, espacio pa warda material, sala di reunion, y lo tin un balcon special pa invitado-, patrocinador- y dignatarionan cu lo ta presente na caredanan.

   E parti mas abao lo ta un garage unda lo warda tur ekipo cu ta bay wordo cuida, y nan lo percura pa nan ser cuida.

   Werleman a gradici Lotto pa Deporte, y tambe Ministro Gerlien Croes, pa e sosten aki.  Pa comienzo di 2027 pues lo tin un Toren nobo.  E potretnan aki pa cortesia di Ministerio di Deporte.