Sabrine Setrodjemino a defende su tesis exitosamente y a gradua como Bachelor den OGM

ORANJESTAD (AAN): Dia 7 di September 2026, Sabrine a defende su tesis exitosamente y a obtene e titulo di

‘Bachelor of Arts’ for di e programa Organization, Governance and Management (OGM), Facultad di Arte y Ciencia.

Sabrine Setrodjemino a defende su tesis titula:

Building Bridges: Policy-Related Enablers and Barriers Influencing Potential Collaboration Between Directie Volksgezondheid and Quick-Service Restaurants in Obesity Prevention in Aruba

Sabrine Setrodjemino a investiga un tema ainda poco explora na Aruba, den cual actualmente no tin un colaboracion formal entre Directie Volksgezondheid (DVG) y Quick-Service Restaurants (QSRs) den prevencion di obesidad. E investigacion a explora e potencial pa tal colaboracion, identificando e factornan relaciona cu beleid cu por facilita of dificulta esaki, y a formula recomendacionnan pa promove un colaboracion efectivo.

E commision di graduacion tawata consisti di Dr. Mieke de Droog, Valerie Maduro, MA y Dr. Esther Vermeulen, Directie Volksgezondheid.

Sabrine a gradici e docentanan di e departamento di OGM y profesional cu a yud'e of gui'e como studiante. Tambe ta gradici tur esnan na y pafo di Universidad di Aruba cu a contribui na un manera of otro na e acontecimento aki.