Gobierno a firma contract pa sigui desaroya diseño integral pa Wilhelminastraat

Lo bay yuda cu su revitalisacion

ORANJESTAD (AAN): Diabierna anochi Gobierno di Aruba a firma oficialmente e contract cu BK Consult pa sigui desaroya e diseño integral pa revitalisacion di Wilhelminastraat.

   Revitalisacion no ta solamente embeyecemento. E ta crea un centro di ciudad unda hende kier y por biba, traha, inverti, bishita, disfruta y pasa tempo atrobe.

  Cu inversion den espacio publico y infrastructura, incentivonan pa stimula inversion y cooperacion entre Gobierno, sector priva y stakeholdernan, paso pa paso nos ta crea e condicionnan centro di  Oranjestad bira mas activo, atractivo y vibrante.

   Pa hopi tempo nos a papia di e vision. Nos a traha plan, bin cu maneho y tuma pasonan concreto pa yega e meta final.  Awe, un otro parti di e vision ta bira realidad.  Wilhelminastraat ta sigui. Oranjestad ta sigui.  E anochi tabatin un agasaho special pa e momento aki, unda diferente dignatario tabata presente. E potretnan aki pa cortesia di Ministerio di Economia.