Masahista declara liber di sospecho di a mishi cu dama

Un dama a bay haci denuncia

ORANJESTAD (AAN): E homber adulto mayor di inicial T. di 77 aña, a presenta dilanti Hues pa e caso penal cu Ministerio Publico a cuminsa contra dje. T. a keda insisti cu e no a mishi cu e dama C.

   El a bisa Hues cu e tin 40 aña ta dedica na masashi y nunca un hende a yega di haci un keho contra dje. Ta asina cu Fiscal a exigi castigo combina pero Hues a declara T. liber pasobra e ta haya cu no tin prueba di sosten.

   Fiscal a bisa cu T. ta wordo acusa cu durante haci trabao di masahista a haci actonan inmoral cu un dama C. riba 30 Augustus 2025.

   Sospechoso ta nenga: Hues a puntra T. si el a haci’e. T. a bisa Hues cu el a haci su trabao di masahista y no a haci nada malo. El a bisa cu e no sa kende e dama ta. Hues a bisa cu un persona cu conoce T. a yama pa haci un cita pa e dama C. Ta asina cu T. a atende e dama cu tin problema na su lies. T. a splica Hues cu e ta usa sarbette pa tapa curpa di e dama y a haci masashi.

   El a bisa Hues cu ningun momento el a mishi na e parti intimo di e dama, manera e dama ta acus’e. El a bisa Hues cu e tin 40 aña ta haciendo e trabao aki y e no ta bay daña su bon nomber, door di mishi cu un dama. El a bisa Hues cu e dama no a bis’e nada.

   Hues a bisa cu e dama a bisa Polis, cu T. lo a hala su panty y su parti intimo tabata tur afor y cu T. lo a mishi cu su parti intimo. Por a mira cu T. tabata sacudi cabez ora cu Hues tabata lesa e relato di Polis, mustrando cu ningun momento el a mishi cu e dama su parti intimo. T. a bisa Hues cu e ta 100 porciento sigur cu e no a mishi cu e dama. El a mustra Hues con el a masashi y cu ta di e dama su rudia bay ariba pero no na su parti intimo. El a bisa tambe cu e yiu di 4 aña di e dama tabata den e camber sinta.

   Hues a bisa cu e amigo di e dama a bisa cu el a keda asombra cu e dama su keho. Pero e mama di e amigo a bisa cu el a yega di tende algo. T. a para riba cu e tin 40 aña ta masashi y e no a mishi cu e dama. Hues a puntra T., si Corte haya T. culpabel y impone trabao pa comunidad, si T. por. T. a reacciona, pakico castigo si e no a haci nada! 

   Fiscal ta exigi castigo: Fiscal a bisa Hues cu e ta haya e declaracion di e dama confiabel. Sinembargo mester di prueba di sosten. E dama a conta dos persona kico a pasa cu ne y ambos persona a constata cu e dama tabata yora. Fiscal ta haya legalmente proba cu T. a mishi na e parti intimo di e dama. Fiscal a bisa cu T. mester paga bon tino con pa trata cu cierto dolornan na curpa di hende.

   Pa cu e castigo, Fiscal a bisa cu e ta tene cuenta cu e edad di T. y cu e tin 40 aña ta haci masashi. Fiscal a exigi 80 ora di trabao di cual 40 ora ta condicional cu 2 aña di prueba.

    Abogado: Abogado mr. Illes a bisa Hues cu T. ta un persona hopi conoci den comunidad y cu T. ta para riba cu e no a mishi cu e dama. E abogado a mustra cu T. no ta corda kende e persona ta. Esey ta mustra cu T. a haci su trabao corecto, sin cu algo a pasa. E abogado a bisa cu T. a bin haya sa di e caso na September 2025, ora cu diripiente el a wordo yama pa Polis pa interogacion.

   E abogado a remarca cu no a haci ningun investigacion medico pa determina si realmente T. a mishi cu e dama. El a mustra cu e yiu homber di 4 aña di e dama, tabata sinta den e camber ora di e masashi. Na opinion di mr. Illes, no tin ningun testigo. E abogado a bisa Hues cu e dos personanan cu a papia, a conta loke e dama a conta nan. Tur declaracion ta for di e mesun fuenta y como tal no por papia di prueba di sosten. El a mustra cu durante 40 aña, T. ta haciendo masashi y nunca el a haya critica.

   E abogado a bisa cu ta incomprendibel cu T. lo a bay mishi cu e dama, siendo cu e dama su yiu ta sinta eynan y lo por reacciona un ora pa otro. E abogado a remarca cu hasta e testigonan nan declaracion ta contradictorio. El a mustra cu e dama mes na Polis ta bisa cu 2 biaha T. lo a pidi sorry y na otro hende e dama no ta bisa nada cu T. lo a pidi sorry. Abogado ta haya cu no tin ningun prueba y tampoco prueba di sosten. E abogado a menciona sentencia di Corte di Husticia na Aruba mes caminda Hues ta haya cu no tin prueba y a declara e sospechoso liber. E abogado a pidi Hues pa declara T. liber.

   Sospechoso declara liber: Hues a cera tratamento di e caso y a bay pensa un rato. Despues di un rato el a bolbe y a dicta sentencia. Hues a bisa cu e ta kere declaracion di e dama. Hues a bisa cu e declaracion di e testigonan no ta suficiente prueba di sosten. Hues a bisa cu e ta declara T. liber.

    Por a mira cu e homber T. a keda hopi satisfecho cu e decision di Hues.