Minister Wyatt-Ras ta den dialogo cu AZV y Hospital

E ta pidi pueblo keda trankil

ORANJESTAD (AAN)-- Minister di Salud y Asuntonan Social, Mervin Wyatt Ras, den un entrevista cu Matutino DIARIO tocante e tema di Hospital dr. Horacio Oduber, a bisa cu e ta mantene esaki hopi breve, pasobra e ta den dialogo, den combersacion cu otro.

“Y nos como Gobierno a bisa cu bao ningun circunstancia nos ta acepta cu tin stalling, pues, cu ta corta den cuido, pasobra nos ta para p’e, nos ta yuda pueblo den esaki, y nos ta den deliberacion hunto cu AZV y Hospital, p’asina nos por garantiza cu nan por haci loke nan mester haci”, Minister Wyatt Ras a expresa.

E dignatario a agrega cu e trayecto di e analisis financiero ta hopi importante pa gobierno, pa nan haya un bista kico ta pasando, asina nan por sigui a base di esey. “Pero, nos ta na mesa si pa garantiza e cuido di tur dia den Hospital, pasobra e ta na interes general, y nos ta boga p’esey pa pueblo keda mantene e cuido cu e ta haya”, e mandatario a señala.

El a agrega cu e tabata presente na Juli den un presentacion cu Director di HOH a haci, y e ora ey gobierno por cuminza cu un investigacion.

Wyatt Ras ta kere cu ta miho pa nan keda mantene asina aki, y el a pidi pueblo trankilidad. “Pasobra mi ta weita riba facebook yen di hende ta bisa algo, politiconan ta bin dilanti, nan kier haci yen cos, pero como Minister nos a firma un acuerdo di investigacion y un acuerdo tambe cu tur e partnernan, cu nos no ta bay papia aki aya tocante e asunto, nos kier pa independientemente e wordo investiga. No ta pa kibra ningun hende, e ta bay pa e calidad di cuido cu nos ta duna na Aruba y pa nos garantiza esey; pa nos keda trankil pasobra cu e gobierno aki tin su curazon na e lugar corecto, e gobierno aki ta zorg pa nos pashentnan y, seguramente, mi lo keda te na ultimo den dialogo p’asina nos logra cu otro den cooperacion y mira lo miho pa Hospital”, Minister Mervin Wyatt-Ras a bisa pa conclui.