Rey Willem-Alexander ta enfatisa unidad y cooperacion den Reino

Discurso Troonrede 2025 papiando di ‘Nos ta un reino’

ORANJESTAD (AAN): Durante e Troonrede 2026, discurso oficial durante Prinsjesdag, Rey Willem-Alexander a dedica atencion special na cooperacion entre Aruba, Corsou, Sint Maarten, Hulanda y Caribe Hulandes. E Rey a conclui e parti dedica na paisnan di Reino den Caribe cu e palabranan: “Nos ta un reino – wij zijn een Koninkrijk.”

  Gobierno Hulandes a anuncia cu e kier fortifica colaboracion cu tur e paisnan y islanan den Reino. Prome cu e aña aki caba, lo tin un summit di nivel halto entre e cuatro paisnan, unda representantenan lo evalua progreso y conbersa tocante oportunidadnan nobo pa cooperacion.

   E agendanan lo inclui diferente tema importante, entre otro economia, siguridad, cambio climatico y maneho di sushi. Intencion ta pa e summit bira un encuentro anual, creando asina un momento fiho pa e paisnan den Reino dialoga, comparti responsabilidad y traha hunto riba retonan cu ta afecta nan comunidadnan.

   Durante e discurso, Rey Willem-Alexander  a referi tambena e lasonan historico den Reino. Na november lo conmemora cu 250 aña pasa Sint Eustatius a duna e famoso ‘First Salute’, cu a marca reconocemento di Estados Unidos pa Hulanda. Segun e Rey, e momento historico aki ta ilustra tanto e conexion profundo entre e partinan di Reino como nan relacion cu resto di mundo.

   E mensahe central ta cu, apesar di e distancia geografico y diferencia entre e paisnan, nan ta forma parti di un mesun Reino. E summit anual mester contribui na un cooperacion mas continuo y orienta riba resultado.

   E anuncio ta crea expectativa pa acuerdo y accion concreto. E siguiente paso importante lo ta pa clarifica cua prioridad, compromiso y recurso cada pais lo aporta, pa e concepto di “un solo Reino” por traduci den beneficio tangibel pa tur ciudadano.