Practicamente tur werkster a traha extra durante carnaval y te ainda no a wordo paga

Lito Lacle, Presidente di STA

*Awo tin dos trahado so pa laba tur auto policial! 

ORANJESTAD (AAN)-- Presidente di Sindicato di Polis Arubano (SPA), a declara cu e tin un dolor na su curazon, y el a cuminza pa elabora riba e werksternan.

“Laga mi cuminza pa e werksternan, cu ta gana un salario minimo di 1960 florin pa luna, y practicamente tur di nan a traha overtime durante e carnaval cu a pasa, y te dia di awe nan no a wordo paga. Awo nos tin dos persona pa laba tur auto den Cuerpo Policial, den e 40 ora pa siman. Nan no ta bay logra pa laba tur e autonan aki, y atrobe nan ta ‘riba bin’. Kico nos tabata haci den pasado door cu tin dos persona so, Diasabra nan tabata tin traha overtime atrobe, pa zorg cu tur patruya di polis ta limpi, etc. Aworaki, esey no ta pasa. Kiermen, di Dialuna pa Diabierna nan ta zorg pa tur cos ta limpi y si e overtime a wordo traha caba, nos tin cu zorg pa wordo paga”, Lito Lacle a subraya.

Presidente di SPA a sigui bisa cu ora e ta papia cu Mando Policial, nan ta bisa cu nan ta wardando riba advies di DRH, despues mi a papia cu Minister di Husticia, e ta bisa tambe cu e ta wardando riba un advies di DRH, cu mester yega na dje pa cu e pago di e personal civil (burgerpersoneel).

“Si nos wak e burgerpersoneel tambe, e tekort ta riba 40%, pues bo tin cu haci e trabao cu esnan cu bo tin y no tin otro solucion aworaki pa haci esey door di paga nan overtime. Corda bon, nos ta papiando di nuebe werkster, cu tin cu haci 22 edificio limpi. Nos ta bay lab'e? No! Pero atrobe nos tin cu zorg pa nos edificionan ta limpi pa nos coleganan traha den un ambiente higienico y sano, locual awo nos por garantiza”, señor Lito Lacle a resalta.