Ex-Parlamentario dunando les na Colegio Nigel Matthew:
ORANJESTAD (AAN): Recientemente prome cu ultimo dia di Scol, tabatin un ceremonia special cerca Rectorado di Colegio Nigel Matthew na San Nicolas, y DIARIO ta sigur cu ta vale la pena pa comunidad mira e perseverancia enorme cu e persona aki tin.
Aki ta enfocando riba Duke Croes, kende ya for di decada di 1980 tabata duna les di ‘Geschiedenis’ na Colegio Arubano den Vondellaan. Duke tabatin hopi amor y pasion pa su forma di duna les, su conocemento amplio di materia, y a ricibi admiracion di su alumnonan pa esey.
Pesey den decada di 1990 no tabata sorpresa, ora cu Duke Croes a subi lista di Partido AVP, y a logra bay sinta den un asiento den Parlamento, cu e trabao di Parlamentario y asina laborando pa pueblo. Su forma di duna splicacion sea den reunion, of durante entrevistanan cu prensa, tabata haya atencion inmediatamente di esnan cu ta scucha su forma di duna su relato di desaroyonan politico y den reunionnan.
Despues cu el a aleha su mes di Politica, e amor pa duna les den klas a sigui, y el a bay bek ta yuda studiantenan di Aruba. Esey a inclui ‘Colegio Pariba’, cu a bira conoci como Colegio Nigel Matthew, unda el a duna les di ‘Geschiedenis’ y tambe ‘Individu & Samenleving’. E ultimo aki ta elabora riba e relacion entre e persona y sociedad. Bo ta siña con norma, balor, y gruponan ta influencia bo actitud, y con abo como ciudadano critico ta funciona.
Pero e biaha aki, na final di Aña Escolar 2025-2026, Duke Croes a presenta pa un ceremonia special den presencia di Rector ing. Ralph Croes. Esey ta debi cu a tuma despedida di Meneer Duke, kende pa hopi aña largo a duna un contribucion importante na e scol di Colegio Nigel Matthew.
Pues awor, oficialmente docente Duke Croes ta bay disfruta di su merecido pensioen. Despues di hopi aña di comparti conocemento, duna inspiracion y guia otronan, awor e momento a yega pa no pone wekker mas sona mainta trempan.
For di man di Rector Ralph Croes, el a ricibi un regalo di despedida. Pero ta parce cu esaki ta su di diez regalo di despedida. Pasobra ta parce cu ya caba como 10 aña pasa el a baha “cu pensioen”, pero a djis keda duna les di Geschiedenis y tambe Individu & Samenleving, comosifuera ta completamente normal esey. Algun observador a splica na DIARIO, cu nan tin e presentimento cu otro aña un biaha mas e lo declara na Rectorado di Scol: “Mi ta bin yuda boso djis pa algun ora...”
Ningun hende no sa, pero kizas lo por mira Duke regularmente bek pa algun les, ora cu scol haci un peticion riba nan.
Pa awor, masha danki sigur na Duke Croes, pa su trabao incansabel di asina hopi aña, colegialidad, y recuerdonan bunita cu e ta laga atras. Deseonan pa e disfruta di un fenomenal pensioen.
