Mañan tin chens pa mucha muhenan try-out Futbol di Damas

ORANJESTAD (AAN): Si abo como mucha muhe a yega di pensa pa participa den futbol,

of bo ta un mayor buscando mas informacion pabo yiu muhe... Esaki ta bo momento!

   Diasabra awor for di 9:00 am te cu 1:00 pm, por bay disfruta di un mainta yen di diversion unda e muchanan ser femenino por experimenta cu futbol, conoce e clubnan local, participa den entrenamentonan riba veld, scucha storianan di panel inspirativo di hende muhenan den mundo di futbol y descubri tur e oportunidadnan cu e deporte aki tin pa ofrece.

   No ta importa si bo no tin experiencia of bo ta hunga caba, tur mucha muhe di 11 aña bay ariba ta bon bini! Trece bo amiganan of famia, y bin pasa un mainta ameno y crea bo mesun oportunidadnan den mundo di futbol.

   E mainta aki lo ta na Compleho Deportivo Frans Figaroa, y entrada ta gratis.  Djis corda registra di antemano online pa bo haya lugar.  Registra na e website:

www.bit.ly/4gfazwl

   Pa mucha muhenan cu ta cay bao categoria U11 y U13, sesion riba veld lo bay ta di 9:30 am te cu 11:00 am.  Pa mucha muhenan di 15+, e booth di varios club lo ta habri di 9:00 am te cu 1:00 pm.

   Ta pidi tur mucha muhe pa bin cu sapato deportivo (sea keds di core, of zapato di futbol).  Esnan cu registra y presenta, lo haya pa e dia aki un uniform completo, cos di bebe, fruta, y un sandwich.

   Ademas di esaki, nan ta brinda transport for di diferente distrito.  Durante e mainta, lo bay tin regalonan gratis y premionan.  Pues e ta bira un evento pa henter famia.

   Sub riba veld y crea confianza den bo mes. Descubri bo pasion pa futbol.