Minister Rene Herdé ta honra Louis Boekhoudt pa 40 aña di servicio na DLV

ORANJESTAD (AAN): Cu un trayectoria profesional di 40 aña caracteriza pa compromiso, conocimiento tecnico y dedicacion,

señor Luis Boekhoudt, Senior Landsurveying and GIS Project Developer na Dienst Landmeetkunde en Vastgoedregistratie (DLV), a bira un ehempel di excelencia den servicio publico.

Durante su carera, Boekhoudt a contribui significativamente na desaroyo di landmeetkunde y sistema di informacion geografico (GIS) na Aruba. Su conocimento, liderasgo y perseverancia no solamente a gana e respet di su coleganan, sino tambe reconocemento internacional. Na 2024 el a ricibi e prestigioso SAG Award durante e conferencia di ESRI, un logro cu ta confirma su aporte sobresaliente den e campo di GIS.

Actualmente, Boekhoudt ta ocupa e funcion di Acting Director di Dienst Landmeetkunde en Vastgoedregistratie, continuando cu e mesun compromiso pa fortalece e organisacion y garantisa un servicio di calidad na beneficio di Aruba.

Durante un reunion special cu a tuma lugar diahuebs mainta na Cocolishi, Minister di Infrastructura, Rene "Baba" Herdé, a expresa su gratitud y aprecio pa e dedicacion ehemplar di Louis Boekhoudt.

"E compromiso, profesionalismo y amor pa bo trabou a contribui grandemente na desaroyo di DLV y di nos pais. Na nomber di Ministerio di Infrastructura y di Gobierno di Aruba, mi ta felicita bo cu e trajectoria impresionante di 40 aña di servicio. Nos ta orguyoso di bo aporte y ta desea bo hopi exito den e siguiente etapa di bo carera," tabata deseo di Ministro Herde na sr Boekhoudt.

E Ministerio di Infrastructura ta expresa su sincero agradecimento na señor Louis Boekhoudt pa cuatro decada di servicio fiel, innovacion y dedicacion. Su legado lo continua inspira futuro generacion di profesionalnan cu ta traha pa e desaroyo sostenible di Aruba.