Prijs di gasolin subi y costo di cuminda sigui aumenta na juni

ORANJESTAD (AAN) – Consumidornan na Aruba a experimenta aumentonan tanto na prijs di gasolin como den varios producto alimenticio durante luna di juni 2026,

segun e ultimo cifranan publica pa Oficina Central di Estadistica (CBS).

A pesar cu e prijs internacional di petroleo a baha significativamente for di US$102.34 pa bari na mei te US$86.00 na juni, un reduccion di 16%, e prijs di gasolin local a subi cu 11.30 cent pa liter, ekivalente na un aumento di 4.3%. E incremento aki a contribui cu 0.21 punto porcentual na e Indice di Prijs di Consumo (CPI).

CBS ta indica cu prijs di electricidad y awa a keda sin cambio durante e luna, mientras cu diesel tambe no a registra ningun ahuste.

Na mesun momento, e indice di Cuminda y servicio di catering a aumenta cu 0.1%. Den e categoria di cuminda pa cas, e mayor aumento a wordo registra den batata, yuca y batata dushi (+2.2%), carni (+1.1%), sucu, jam y otro cos dushi (+0.6%) y bebidanan no-alcoholico (+0.4%).

E unico caida notabel den e categoria di alimentacion tabata den berdura, cu a baha cu 1.2% durante juni.

Cuminda pafo di cas, entretanto, a permanece practicamente stabil, registrando solamente un reduccion minimo di 0.01%.

Segun CBS, e grupo di utilidad, gasolin y diesel a registra un aumento mensual di 1.3%, mientras cu cuminda na cas y cuminda pafo di cas hunto a contribui cu 0.01 punto porcentual na e CPI di juni 2026.