Grupo di profesional a fortalece nan Papiamento durante curso di Ortografia Etimologico

Fundacion Lanta Papiamento satisfecho cu participacion:

ORANJESTAD (AAN):  Fundacion Lanta Papiamento (FLP) ta hopi satisfecho cu un curso exitoso tocante "Ortografia Etimologico di Papiamento", consistiendo di 4 sesion intensivo dirigi na un grupo di profesional.

Bou di guia di Dr. Joyce Pereira, presidente di Fundacion Lanta Papiamento, e participantenan a profundisa nan conocemento di ortografia etimologico, cu e obhetivo di mehora e forma di skirbi Papiamento, eleva e nivel di comunicacion skirbi y contribui na un uzo mas corecto y consciente di nos idioma.

Fundacion Lanta Papiamento ta felicita tur participante cu a dedica tempo, interes y esfuerso pa sigui profesionalisa nan mes. Iniciativa manera esaki ta yuda nos domina nos idioma miho.

Masha pabien na tur esnan cu a tuma e reto di sigui siña, promove y haci uzo di un Papiamento corecto.

Den un futuro cercano Fundacion Lanta Papiamento lo anuncia un otro curso di e mesun indole.

FLP ta gradici Departamento Arubiana-Caribiana di Biblioteca Nacional Aruba pa a pone e sala disponibel.