“ATA no por bira un banco di Gobierno”

Parlamentario Eduard Pieters:

ORANJESTAD (AAN): Cu e frase aki, lider di fraccion di PPA, Eduard Pieters, a cera su di dos intervencion den Parlamento, transformando un debate tocante un contract pa maneho di desperdicio den un cuestion hopi mas grandi: ki limite Gobierno tin, ora e ta uza placa publico? Segun Pieters, niun hende no ta discuti cu Aruba mester ta limpi. E obhetivo ta corecto. Pero, segun Pieters, un bon meta nunca por hustifica violacion di ley ni debilitacion di Parlamento. 

ATA no tabata crea pa bira un banco di Gobierno

Den su replica, Pieters a pone un advertencia fuerte. Segun e parlamentario, si Gobierno por uza e fondo di ATA pa financia maneho di desperdicio, e pregunta ta bira: Unda e limite ta? “Si awe ATA por paga container di sushi, mañan lo por paga asfalt di caminda, renobacion di e scolnan, bodycam pa polis, cuido di adulto mayor of cualkier otro gasto cu ta responsabilidad di otro ministerio?” 

Pieters a bisa cu, si nos sigui e logica aki, ATA ta perde su mision original y ta bira simplemente un fuente alternativo di financiamento pa Gobierno. “Pues, awor si por confirma cu Aruba tin un banco nobo: “ATA Bank.”

Segun e lider di fraccion, esaki no ta solamente un comentario sarcastico. Ta un advertencia politico. 

No por djis pone Parlamento un banda

Pieters a expresa su preocupacion cu, segun e, Parlamento ainda no tin claridad tocante con lo uza e 16 miyon florin. “Ta Parlamento ta controla placa di pueblo. No un ministerio.”

Segun Pieters, e peligro ta, cu e noble intencion di haci Aruba limpi, no por wordo uza como argumento pa crea excepcion riba excepcion, te ora cu Parlamento perde control riba gasto publico. “E fin no ta hustifica e medio.”

Destino di placa publico tambe mester sigui ley y p’esey mes Pieters a cuestiona e decision, unda no a sigui un proceso completo di destaho publico, manera articulo 21 di Landsverordening Instelling ATA ta stipula. Segun Pieters, un destaho publico no ta crea, pa garantisa cu un solo compania ta gana. Esaki ta crea pa garantisa igualdad di oportunidad.

“Awo mi a ricibi yamada di diferente compania cu tambe tabata interesa pa participa. Pero nan nunca a haya e oportunidad igual manera ta stipula den e ley.” Esaki ta precisamente e problema, paso no ta cuestion di djis ken a haya e contract, sino ken nunca a haya oportunidad di competi. 

Un Parlamento fuerte ta proteha bon gobernacion

Den su mensahe final, Pieters a bisa cu un oposicion fuerte no mester ta un obstaculo pa goberna. Ta un rekesito pa bon gobernacion. “Bo no por papia di bon gobernacion cu un Parlamento swak.”

P’esey PPA lo sigui cuestiona cada decision, caminda tin duda tocante transparencia, legalidad y uzo di e fondonan publico. Paso, pa Eduard Pieters, e principio ta simpel:

“Un gobierno por tin bon intencion. Pero ora ta pone ley un banda, Parlamento tin obligacion di para y haci su trabou na drechi y no djis bay di acuerdo cu tur cos, djis paso bo ta sostene gobierno, manera ta e caso awor.”