Apesar di e desaroyonan y movecionnan ainda falta hopi den centro di San Nicolas

Segun Parlamentario Mike de Meza:

ORANJESTAD (AAN): “Apesar di e desaroyonan y movecionnan den centro di San Nicolas, ainda falta hopi”, asina Parlamentario Mike de Meza a expresa. El a remarca cu San Nicolas y tur districto pariba di brug, tin mester di atencion specialmente awo cu tin un hotel cu ainda ta den construccion, pero ta nifica algo grandi pa nos economia y progreso tanto pa San Nicolas como pa Aruba henter.

   Hotel Secrets tin efecto grandi riba e movecionnan di auto y taxi na San Nicolas y pariba di brug. Apesar di esaki, ainda falta hopi trabao pa haci. Caretaranan ta den mal estado, falta di iluminacion, y tambe actualmente no tin indicacionnan di direccion pa turistanan yega na e hotel mas facil y lihe.

   “Nos mester pone accion. No por ta asina cu departamentonan ta dura mas di dos aña pa pone of drecha caretera cu ta hopi importante”, Parlamentario de Meza a expresa.

   El a menciona cu el a entrega diferente mocion den reunionnan den Parlamento y tambe a vocifera publicamente riba e situacion aki sin haci diferencia cu ta su partido ta den Gobierno cu e ta sostene, pasobra segun e, e interes general ta bay riba interes di partido.

   Parlamentario de Meza a enfatisa cu esaki ta e unico motor economico cu tin pariba. Pero cayanan ta malo, no tin iluminacion, no tin beach policy pa beachnan pariba, y esakinan mester cuminsa haya atencion. “Mirando cu turismo ta entrada principal di Aruba, nos mester percura pa adverti y asisti nan ora nan haya nan mes den dificultad, pasobra nan ta representa un entrada pa nos. Pa esaki, por bin cu proyecto di lifeguards na e beachan aki.

   “Nos mester pone mas atencionnan na beachnan di San Nicolas cu contrario na beachnan pabou, no ta wordo manteni y no ta bunita drecha, mas bien nan ta un desaster. Turistanan ta bin nos isla principalmente pa nos beachnan. Pa e motibo aki mi a urgi Minister di Turismo pa aloca placa den nos beachnan pasobra esaki ta parti di e producto Aruba cu nos ta bende internacionalmente”, Parlamentario de Meza a expresa.