Minister mester publica conseho di LAR tocante biahe den jet priva

MEP ta exigi transparencia:

ORANJESTAD (AAN): Dialuna, 13 di juli 2026, Fraccion di MEP a exigi formalmente durante un conferencia di prensa pa Minister Gerlien Croes entrega un copia di e conseho cu e Comision di Landsverordening administratieve rechtspraak (LAR) a emiti den cuadro di e biahe oficial realisa den un jet priva. 

Exigencia pa transparencia

Dia 10 di juli 2026, e Comision di LAR a confirma por escrito cu e conseho concerni a wordo manda na e mandatario. Segun e stipulacionnan legal, e Minister tin un plaso di seis siman pa tuma un decision nobo a base di e peticion aki di MEP. E caso en cuestion ta trata di un peticion pa haya acceso na documentacionnan oficial tocante e biahe di trabou cu a tuma luga aña pasa, dia 19 di november, den un jet priva. Fraccion di MEP a solicita formalmente, entre otro: 

• E prueba di pago di e biahe.
• Informacion detaya tocante e costonan di e vuelo.
• E permiso comercial di e avion.
• E lista oficial di pasahero.
• Cualkier otro documentacion relevante relaciona cu e biahe aki. 

Fraccion di MEP ta enfatisa cu e informacion y documentonan aki ta sumamente crucial pa Parlamento por ehecuta su tarea constitucional di control debidamente. 

Te cu awe, casi ocho luna despues di e biahe, e documentonan solicita ainda no a wordo entrega. Minister Gerlien Croes ta keda insisti cu e no mester duna cuenta, pasobra segun su persona, e mes a paga pa e biahe. Fraccion di MEP no ta di acuerdo cu e postura ey; ora un minister ta biaha den funcion oficial, su actonan mester ta transparente, controlabel y verificabel. E caso aki, segun varios conseho huridico, ta duna substancia na un evaluacion serio tocante integridad y cumplimento di ley. 

MEP ta considera cu e conseho di Comision di LAR por contribui na trece claridad y transparencia, y p’esey ta haci un yamada publico na Minister Gerlien Croes pa entrega un copia di e documento aki, mientras cu e ta studia con e lo ehecuta e conseho. “No tin ningun motibo pa mantene e documento scondi. Transparencia no mester cuminsa solamente despues cu un decision a wordo tuma. Transparencia mester cuminsa awor,” fraccion di MEP a declara. 

MEP ta enfatisa cu e lucha aki no ta pa crea sensacion, sino pa garantisa cu e pueblo di Aruba ta haya e informacion cu ley ta stipula y cu Parlamento por haci su tarea di control di un manera efectivo.

Fraccion MEP lo sigui insisti riba un cos so: e berdad, transparencia y dunamento di cuenta.