Castigo combina pa homber cu a estafa 12 hende

Ademas di tin cu paga e mayoria nan placa bek

ORANJESTAD (AAN): Diabierna Hues a dicta sentencia den e caso penal cu Ministerio Publico a cuminsa contra e homber A.K.M. E ta wordo acusa cu den e periodo di 1 Augustus 2025 te 18 Januari 2026 a hiba varios persona na pag’e of haci debe bao pretextonan, manera cu e ta huur apartment, ta bende auto, ta famia di notario, ta experto of ta dunador di trabao. En total 12 persona a wordo estafa door di A.K.M. Ta asina cu A.K.M. no a presenta den Corte. El a prefera keda na KIA. Su abogado mr. Illes si a presenta.

   Fiscal: Luna pasa tratamento di e caso a tuma lugar caminda Fiscal ta haya A.K.M. culpabel. Pa cu e castigo, Fiscal a bisa cu e ta tene cuenta cu e raport di psicologo cu ta mustra cu A.K.M. tin un problema mental y mester di tratamento. Fiscal a mustra cu den pasado A.K.M. ya a wordo condena pa caso similar pero no a siña di esaki.

    Fiscal ta kere cu awor mester duna A.K.M. chens pa e cura. Fiscal a bisa cu A.K.M. tin talento pa convence hende pero ta us’e robez. Fiscal a mustra cu loke A.K.M. a haci, a causa hopi preocupacion na e victimanan. Fiscal a exigi 12 luna di prizon di cual 6 luna ta condicional cu 3 aña di prueba. Durante e tempo di prueba, A.K.M. mester cay bou guia di Reclasering. A.K.M. mester sigui tur instruccion di Reclassering.

   Sentencia: Diabierna Hues a bisa cu A.K.M. ta culpabel di estafa un cantidad di hende. Hues a bisa cu 10 hende nan demanda di daño ta keda honra y 2 no. Hues a bisa cu e homber A. y e dama A., nan demanda di daño no ta keda honra. Hues ta haya cu no a keda proba cu A.K.M. lo a presenta su mes como famia di un notario y un experto. Hues ta haya cu no tin prueba di sosten. Pesey Hues a declara A.K.M. liber pa e dos acusacionnan aki. Hues a bisa cu e ta tene cuenta cu raport di psicologo cu ta mustra riba e comportacion anti social di A.K.M. di estafa hende. Psicologo ta haya cu A.K.M. no ta completo responsabel pa su actonan. Hues a bisa cu anterior A.K.M. a haya condena pa caso similar.

   Hues ta confirma e exigencia di Fiscal. Hues a condena A.K.M. na 12 luna di prizon di cual 6 luna ta condicional cu 3 aña di prueba. Tambe Hues a ordena cu A.K.M. ta cay bou Reclassering pa e haya tratamento na Respaldo. Pa loke ta e demandanan di daño, Hues a ordena A.K.M. pa paga e victimanan daño pero no a confirma e demanda di daño inmaterial pa algun pasobra Hues ta haya cu e demanda no ta completo splica pa raport medico. Hues a impone medida di pago y si A.K.M. no paga, e lo haya castigo di prizon riba e castigo cu e tin caba.