Hues a hala atencion di instituto financiero pa ta cobra interes mas halto cu ley ta stipula

Den caso di instituto financiero contra cliente pa paga cuenta atrasa

ORANJESTAD (AAN): Den edicion di Diasabra, ya caba DIARIO a trece un detaye chikito di un recien sentencia den Corte di Husticia, cual caso a wordo entabla door di un cliente cu no ta di acuerdo cu e porcentahe halto di interest cobra na dje.

   Awe DIARIO ta trece relato mas amplio di e caso, unda recien Hues di Corte di Husticia di Aruba a dicta un interesante sentencia den un caso cu Island Finance Aruba (IFA) a cuminsa contra un cliente masculino di inicial, kende segun IFA no ta cumpliendo cu pagonan. Tambe ta asina cu e ciudadano di inicial M. a cuminsa un caso contra su ex-señora Q. pa haya liberacion di pago.

   Hues a bati riba nan dede: E caso ta relaciona cu un debe cu M. tin cu IFA y no tabata cumpliendo debidamente cu e pagonan. IFA, pa medio di su abogado a manda M. carta pa paga un suma cu ta mas cu loke M. realmente ta debe. Esaki ta debi na gastonan extra entre otro boet cu segun IFA a bin acerca.

   Hues, den su evaluacion di e caso, ta bati riba dede di IFA mustrando cu ni cinco aña pasa, esta na April 2020 caba, Hof di Corte Superior ta hala atencion di IFA pa ta cobrando interes mas halto cu segun ley ta stipula pa banconan. Hof ta mustra cu si ta cobra interes mas halto cu 27 %, esaki ta invalido door cu e ta contra e bienestar di Aruba y orden publico. Hues den su evaluacion ta mustra IFA mester atene su mes na su obligacionnan cuidadoso. Hues ta haya cu IFA no tin derecho di haya e interes di pago cu e ta exigi.

   No por cobra interes exagera: Hues ta mustra cu segun e sentencia di Hof, e interes cu IFA a stipula na 2019 tabata 5 % mas halto cu e tarifa cu tin y a declara e prestamo invalido.

   Hues ta mustra cu e sentencia di April 2020 di Hof, ta pa proteha tur esnan cu ta bay fia placa na banco, cu nan no ta haya nan cu obligacionnan financiero mucho pisa.

   Hues ta mustra cu e sentencia aki ta conta pa tur otro institucion financiero y banco na Aruba, caminda no por sobrepasa e maximo di 27 % di interes. Hues ta haya cu IFA mester a revisa su interes halto cu el a exigi di e homber M. Hues ta haya cu IFA mester sa masha bon cu e interes cu el a fiha pa M. no ta valido.

   Demanda di pago rechaza: Hues a haci un calculacion di e demanda di IFA riba e debe cu M. lo tin cu paga. Hues ta mustra cu e placa cu segun IFA, M. debe, a wordo cubri caba na 2023. Hues a rechaza e demanda di IFA y a rechaza e demanda di M. contra su ex-señora.