Razzia den Caya St. Maarten a produci detencion di 3 hoben local

Relaciona cu tiramento di dos siman pasa

• Despues un hoben mas a entrega su mes 

ORANJESTAD (AAN): Diabierna den oranan di madruga, cu bendicion di Ministerio Publico, un grupo di autoridad hudicial a tene un razzia na San Nicolas.

   E oficialnan den bon coordinacion, asina a tene un entrada hudicial den Caya St. Maarten. Aki nan a haci uzo di team di Aresto, Unidad di K-9 y polis uniforma di San Nicolas.

   Vocero di Polis a splica cu tabata ta trata di un investigacion relaciona cu e caso di tiramento cu a tuma lugar riba Diadomingo 21 Juni 2026 dilanti Pacifico Restaurant na San Nicolas. E dia encuestion pa mas o menos 3:55’or di atardi central di polis ta despacha patruya di polis di San Nicolas na altura di Pacifico Restaurant pa un caso di tiramento.  A bin haya informacion cu tabatin dos auto envolvi den e caso aki. Ta trata di un Nissan March color blauw y un Toyota Altezza color shinishi.

   Na yegada di Polis e atardi ey, no a topa mas cu e autonan na e lugar di sucedido. Polis a controla rond y ta bin topa cu no djis e hulsnan pero tambe perforacion di bala.

   Diferente unidad di polis a cuminsa busca den e cayanan rond pa wak si por topa cu e sospechosonan. Un rato despues den Caya Bonaire, polis ta bin topa cu e auto Altezza color shinishi para sin ningun hende den dje. E auto a wordo confisca pa cu e investigacion.

   Departamento di Recherche di San Nicolas a sigui cu e investigacion trahando incansabelmente y Diabierna 3 di Juli 2026 den oranan di madruga a tene un razzia unda finalmente a pone man riba 3 sospechoso. Ta trata di e hombernan D.R di 27 aña naci na Aruba, L.T.D. di 23 aña naci na Aruba, y K.R. di 18 aña naci na Aruba.

   Despues den oranan di merdia e otro sospechoso, hoben masculino, busca pa cu e caso aki a presenta na warda di polis San Nicolas y a entrega su mes. Ta trata di M.P.Y. di 17 aña naci na Aruba.

   Cuerpo Policial Aruba ta haci un suplica na esnan cu sa algo of a wak algo pa yama e tipline di polis cu ta 111-41.  Nan ta garantiza cu abo como dunado di tip lo keda anonimo.