DAS ta premira cu 460 studiante lo mester entrega declaracion cu nan ta bay scol

Marceylaine Paskel di DAS:

• Por entrega schoolverklaring solamente di 24 pa 27 Augustus 

ORANJESTAD (AAN) Segun Relacionista Publico di Departamento di Asuntonan Social (DAS), Marceylaine Paskel, e aña aki ta premira cu 460 studiante lo mester entrega declaracion cu nan ta bay scol (schoolverklaring). Esaki por haci solamente riba 4 dia stipula pa DAS den luna di augustus.

   Cada cliente, sea ta adulto, mayor cu ta atende scol den dia of mayornan cu tin yiunan cu ta bay scol den dia, mester entrega un schoolverklaring na oficina di DAS. Mayornan cu tin yiunan di 3 aña of mas, cu ta bayendo un creche cu ta registra bou di Fundacion Pa Nos Muchanan, tambe mester entrega un schoolverklaring.

   DAS ta manda e schoolverklaringnan na tur scol y crechenan, na unda cu mayornan por haci e peticion di e schoolverklaring na scol mes.

   Entrega di e schoolverklaring por wordo haci solamente riba 24, 25, 26 y 27 di augustus na e localidad di DAS mas cerca di e cliente. Paskel a enfatisa cu e fechanan aki mester wordo respeta, pasobra clientenan cu no entrega e documento den e periodo stipula lo perde nan derecho riba e beneficionan aki pa e aña escolar nobo y lo cobra solamente e bijstand normal.

   DAS tambe ta pidi clientenan cu tin sosten financiero y cu a decidi di stop scol pa informa e departamento na tempo, sea via WhatsApp of email, pa evita problema of cierto boetnan.

   Paskel ta splica cu unabes cu entrega e schoolverklaring, clientenan lo haya schooltoelage di 300 Florin pa luna, Ouderlijke bedrag cu ta wordo deposita riba cuenta di banco di scol te cu un maximo di 250 Florin. Y tambe nan lo ricibi un suma pa articulonan pa scol.

   DAS ta recorda cu entrega di e schoolverklaring riba fechanan menciona ta un rekisito indispensabel pa ricibi e beneficionan escolar durante e aña escolar nobo.