Ministro Geoffrey Wever indicando cu tur cos ta cla pa e prome edicion di San Nicolas Food Festival

Awetardi den Carnival Village

ORANJESTAD (AN): Awe Diabierna 3 di Juli 2026, Aruba completo ta bay celebra e prome San Nicolas Food Festival. For di 6:00 pm te 12:00 am, Aruba Carnival & Entertainment Village lo bira e curason culinario di Aruba. E entrada ta completamente gratis y tur hende ta cordialmente invita.

   E festival ta mas cu un evento culinario, e ta un estimulo economico pa e comerciantenan di San Nicolas. E evento ta un inversion den e futuro di un districto cu tin historia, caracter y potencial. Pa Minister di Finansa, Asunto Economico y Sector Primario Geoffrey Wever, e San Nicolas Food Festival ta un ehempel concreto di con gobierno y comunidad por traha huntu pa stimula e economia local.

   San Nicolas tin un identidad culinario cu ta unico den Caribe. For di e dianan di Lago Refinery, e districto a bira cas di famianan for di diferente isla den region, manera Jamaica, Trinidad & Tobago, Barbados, Grenada, St. Vincent, Haiti, Republica Dominicana, Colombia, Venezuela y hopi otro paisnan. E mezcla di pueblo, tradicion y sabor a crea un herencia gastronomico cu no por encontra na ningun otro lugar na Aruba. Johnny cake, roti, oxtail, pisca hasa, moro, carne mechada, sopinan, pastry local, juice natural - cada plato ta conta e historia di un pueblo.

   Pa e prome edicion, 30 empresario a confirma nan participacion y lo ofrece bishitantenan e mihor cumindanan local. E festival lo crea oportunidadnan pa  clientela nobo, lo genera empleo y lo fortalece inversion priva den e districto. Ta exactamente e tipo di actividad economico cu Minister di Finansa Geoffrey Wever ta apoya y ta promove.

   Lo tin algo pa tur hende. Musica en bibo, DJ’s local, Steelpan, artistanan y agrupacionnan di San Nicolas lo crea e ambiente durante e anochi. Pa muchanan lo tin un Kid’s Corner cu Dino Jump gratis y actividadnan recreativo. Un anochi completo pa henter famia.

   E San Nicolas Food Festival ta parti di un vision mas amplio. Como Cultural Heritage City di Aruba, San Nicolas merece atencion continuo, inversion strategico y orguyo nacional. Gabinete AVP-Futuro ta trahando consistentemente pa posiciona e districto como un destinacion culinario, cultural y turistico den Caribe. E festival aki ta e inicio di algo mas grandi. Manera palabra den e Programa di Gobernacion AVP-Futuro 2025-2028 riba pagina 40 unda cu revitalisacion di San Nicolas mester bay hunto cu inicitivanan pa henter e area di San Nicolas.

   “Nos ta kere firmemente cu desaroyo economico mester bay hunto cu desaroyo cultural. E San Nicolas Food Festival ta un ehempel di con nos por crea oportunidad economico pa nos empresarionan local, mientras cu nos ta celebra e herencia multicultural cu ta haci San Nicolas tan special. Nos kier pa henter Aruba y nos bishitantenan descubri cu San Nicolas no ta solamente un lugar pa bishita - ta un lugar pa biba experencia, pa conoce cultura y pa disfruta un di e oferta culinario mas diversifica den Caribe,” Minister Wever a comenta.   Portanan ta habri na 6:00 pm y entrada ta completamente gratis.