Gobierno ta fortalece proteccion di consumidor cu supervision di Canasta Basico

Entrante 15 di augustus 2026

ORANJESTAD (AAN): Gobierno AVP-FUTURO ta sigui cumpli cu su compromiso pa fortalece poder di compra di tur famia Arubiano. Entrante 15 di augustus 2026, Minister di Finansa, Asuntonan Economico y Sector Primario Geoffrey Wever ta introduci un sistema di supervision structural pa cumpli cu e Ley di Prijs (Bestuurlijke Handhaving Prijzenverordening). Cu e paso aki, pa prome biaha e ley no solamente ta stipula prijsnan maximo pa productonan di e Canasta Basico, sino tambe ta wordo sosteni cu un mecanismo di control y sancion pa garantisa cu e reglanan ta wordo respeta pa tur comerciante.

E supervision lo wordo ehecuta pa Departamento di Asuntonan Economico, Comercio y Industria (DEACI), cu lo haci control regularmente y tambe riba base di kehonan si supermercadonan y distribuidornan mayoritario ta respetando e prijsnan maximo stipula pa Gobierno y si tur producto ta mustra su prijs claramente. Cu e adaptacion den e Ley di Prijs, Gobierno tin awo e instrumento legal pa impone sancion administrativo (boet) na empresanan cu no ta cumpli cu e obligacionnan legal, pues cu ta bende producto mas caro cu e prijs maximo estableci pa Minister di Asuntonan Economico, mihor conoci como e “Canasta Basico”. Esaki ta marca un cambio fundamental den manera cu Gobierno ta proteha e consumidor.

Minister Geoffrey Wever a indica cu e meta principal di e medida no ta pa castiga comerciante, sino pa crea un sistema transparente y confiabel caminda tur hende por sa cu e prijsnan di e productonan esencial realmente ta wordo respeta.

“Proteccion di consumidor no por keda solamente riba papel. Si Gobierno ta determina prijsnan maximo pa e Canasta Basico, e tin tambe e responsabilidad pa percura cu ta cumpli cu nan. Cu e sistema di supervision aki nos ta cambia e forma di traha completamente: di un sistema cu dependia principalmente di bon boluntad, pa un sistema cu ta basa riba control, responsabilidad y cumplimento. Esaki ta un paso importante den nos lucha pa fortalece poder di compra di nos Pueblo,” segun Minister Geoffrey Wever.

Controladonan di DEACI ta ehecuta inspeccionnan rutinario y inspeccionnan riba base di keho. Durante control nan ta verifica si e prijs no ta mas halto cu e prijsnan maximo stipula pa gobierno y si tur producto tin indicacion di prijs. Ora constata un infraccion, por impone un last onder dwangsom of un boete administrativo, conforme e proceduranan legal vigente. E enfoke ta crea un sistema consistente y igual pa tur comerciante, cu regla cla y ehecucion imparcial.

Minister Wever a enfatisa cu e iniciativa aki ta forma parti di un strategia mas amplio pa fortalece e posicion di consumidor, aumenta transparencia den mercado y contribui na un economia caminda e beneficionan di crecemento economico ta bira algo cu den e cas di cada familia tambe ta sinti. “Bo no por midi un economia fuerte solamente cu cifra macroeconomico. E medida di exito cu ta conta, ta si un mama por cumpra su canasta basico cu mas siguridad, si un pensionado por confia cu e prijsnan ta husto, y si tur ciudadano sa cu Gobierno ta protehando su interes. Esaki ta exactamente loke nos ta logra cu e reforma aki,” minister Wever a comenta.

Cu e implementacion di e supervision di Ley di Prijs, Gobierno AVP-FUTURO ta dal un otro paso importante den su agenda pa fortalece poder di compra, proteha consumidor y modernisa e instrumentonan cu ta garantisa un mercado mas husto y transparente pa Aruba.