Controladornan di DEACI lo eherce control rutinario of segun keho na tur supermercado

Supervision di ‘Ley di Prijs’

ORANJESTAD (AAN): Entrante 15 di augustus 2026, Minister di Finanzas, Asuntonan Economico y Sector Primario ta introduci e supervision riba ‘Ley de Prijs’ (Bestuurlijke Handhaving Prijzenverordening) 

E meta di e supervision di e ‘Ley di Prijs’ ta pa tur comerciante respeta e prijs di productonan basico di primera necesidad (Canasta Basico), cu ta stipula pa gobierno.

Departamento di Asuntonan Economico, Comercio y Industria (DEACI) ta eherce e supervision di e ‘Ley di Prijs’, specificamente riba maneho y cumplimento di prijsnan di e productonan di canasta basico, y riba indicacion di prijs riba tur producto na supermercadonan.

Conforme e cambio den e 'Ley di Prijs', entrante 15 di augustus 2026 gobierno ta impone boet na tur supermercado y distribuidor mayoritario cu no ta cumpli cu e prijs maximo stipula pa productonan di e Canasta Basico.

Controladornan di DEACI ta eherce control rutinario of segun keho na tur supermercado. Durante control nan ta verifica si e prijs no ta mas halto cu e prijsnan maximo stipula pa gobierno y si tur producto tin indicacion di prijs. Den caso di un infraccion riba e ley lo actua conforme e procedura stipula cual por ta un Last Onder Dwangsom of un boete.