Director nobo di Banco Central di Aruba a huramenta

ORANJESTAD (AAN): Minister di Finansa, Asuntonan Economico y Sector Primario, Geoffrey Wever,

ta felicita Banco Central di Aruba (CBA) cu e huramentacion di su presidente nobo, sr. Thomas Domhoff, dilanti Gobernador Alfonso Boekhoudt di Aruba cu a tuma lugar na Cas Ceremonial di Gobernador riba 25 di juni 2026, den presencia di, Minister Geoffrey Wever, representantenan di e Raad van Commissarissen di Banco Central di Aruba Sr. Gerardo Oduber y Director Di Banco Central Sr. Prakash Mungra y  famia di sr. Domhoff.

   E nombramento di sr. Domhoff a sigui un proceso extensivo y independiente lidera pa e Raad van Commissarissen di Banco Central di Aruba, bao di presidencia di sr. Arie Swaen. Como organo encarga cu supervision strategico di Banco Central di Aruba, e Raad van Commissarissen a maneha e proceso completo di buskeda, evaluacion y seleccion di candidatonan, incluyendo colaboracion cu un experto externo pa defini e perfil di e posicion.

   A base di nan evaluacion profesional y criterio independiente, e Raad van Commissarissen a identifica sr. Domhoff como e candidato mas adecua pa lidera Banco Central di Aruba den su siguiente fase di desaroyo. Siguiendo e recomendacion aki, Minister Wever a nombra sr. Domhoff como Presidente di Banco Central di Aruba pa un periodo di cinco aña.

   Sr. Domhoff ta un ehecutivo cu mas di 30 aña di experiencia den sector financiero, bancario, agricola y educacional, tanto na Curaçao como internacionalmente. Durante su carera profesional, e a ocupa varios posicionnan ehecutivo di alto nivel, incluyendo recientemente e funcion di CEO di GI-RO Settlement Holding N.V. (GSH) na Curaçao.

   Minister Wever ta expresa su confianza cu e experiencia amplio, liderazgo strategico y enfoke riba innovacion y desaroyo di capital humano di sr. Domhoff lo contribui na sigui fortalece e rol di Banco Central di Aruba pa sigui maneha e stabilidad financiero di e Florin di Aruba y confianza economico.

   Minister Wever ta aprecia e proceso independiente conduci pa e Raad van Commissarissen y ta enfatisa e importancia di gobernacion solido y transparente den institucionnan clave manera Banco Central di Aruba.

   “Banco Central di Aruba ta un institucion fundamental pa nos economia y sistema financiero. Pa e motibo ey ta importante cu nombramentonan di e calibre aki tuma lugar a base di merito, experiencia y un proceso independiente y transparente,” Minister Wever a indica.

   E transicion aki ta marca un momento significativo pa Banco Central di Aruba, despues di casi binti aña di liderazgo di Señora Jane Semeleer, lagando atras un legado remarcabel, no solamente como e prome hende muhe pa ocupa e posicion di Presidente di Banco Central di Aruba, sino tambe pa su liderazgo firme durante periodonan di reto economico global y desaroyo financiero importante pa Aruba y pa tabata responsabel pa mantene e stabilidad di e Florin Arubiano

   Minister Wever ta expresa su gratitud na señora Miriam Gonzalez, cu desde e salida di presidente anterior di CBA señora Jane Semeleer a fungi como Presidente-Interino di Banco Central di Aruba y hunto cu Director Sr. Prakash Mungra a gia Banco Central den e periodo di transicion, cu apoyo di full e equipo profesional di Banco Central di Aruba. Durante e periodo di transicion aki, señora Gonzalez a lidera e institucion cu profesionalismo, estabilidad y compromiso.

   Finalmente, Minister Wever ta duna un caluroso bon bini na sr. Thomas Domhoff y ta desea hopi exito den e reto nobo aki, Sr. Domhoff lo cuminsa eherce oficialmente su posicion como Presidente di Banco Central di Aruba desde prome di juli 2026.

   “Mi ta desea sr. Domhoff tur exito den e responsabilidad importante cu e ta asumi awe. Mi tin plena confianza cu, hunto cu e ekipo profesional di Banco Central di Aruba, e lo sigui fortalece e institucion y contribui na un futuro financiero solido pa Aruba,” Minister Wever a conclui