Fundacion Chico Harms, ELMAR y partnernan ta lansa Temporada di Dia di Brazil 2026

ORANJESTAD (AAN): Fundacion Chico Harms ta organisa Festival Cantica di Caya como parti di e Temporada di Dia di Brazil 2026,

un iniciativa cu N.V. ELMAR ta hopi orguyoso di por aporta na dje. E aña aki ta marca e segundo aña consecutivo cu ELMAR ta participa como patrocinado oficial di e festival aki.

Festival Cantica di Caya ta un iniciativa cultural cu tin como meta pa stimula creacion di musica y cantica crioyo, mientras ta sigui mantene nos ritmonan tradicional bibo. Durante e festival, publico lo por disfruta di ritmonan manera Tambu, Danza, Tumba y Mazurka, cu ta forma parti importante di nos identidad cultural.

E festival lo tuma luga riba diabierna 24 y diasabra 25 di juli na Centro di Bario Brazil.

Durante aña, ELMAR ta sostene diferente iniciativanan cultural y comunitario, incluyendo Dia di Brazil. Pa ELMAR, stimula, preserva y celebra nos cultura y folklore ta un componente esencial di su programa di Corporate Social Responsibility (CSR). Door di apoya iniciativanan manera Festival Cantica di Caya, ELMAR ta reafirma su compromiso cu comunidad y cu e tradicionnan cu ta uni nos como pueblo.

E Temporada di Dia di Brazil ta cuminsa na juli cu Parada Acustico, sigui cu Festival Cantica di Caya, y ta finalisa na september cu Parada di Lanterna y e gran Parada Folklorico Cultural. E temporada aki ta un celebracion di cultura, musica, creatividad y union den e bario di Brazil.

N.V. ELMAR ta desea henter comunidad un celebracion dushi, sano y sigur. “Sinti e energia” di nos cultura cu ta bira realidad na Festival Cantica di Caya!

galleryFundacion Chico Harms, ELMAR y partnernan ta lansa Temporada di Dia di Brazil 2026/gallery