AWA ta haci un yamada urgente na comunidad

Sterilisacion gratis pa cacho y pushi:

* Campaña gratis di sterilisacion ta sigui

* Transporte tambe ta disponibel 

ORANJESTAD (AAN)--  Ilona Henriquez, boluntario na Animal Welfare Alliance Aruba (AWA) y Nine Lives Aruba Foundation, a splica den entrevista cu Matutino DIARIO, cu nan ta diferente fundacion cu ta traha hunto den un clinica cu ta haci sterilizacion di cacho cu pushi, y cu actualmente tin un campaña cu ta andando for di siman cu a pasa y e siman en curso ainda.

E siguiente siman nan lo ta cera, y esun despues ta bolbe habri, na Juli tambe nan lo ta un par di siman habri, y nan kier invita henter pueblo di Aruba, esnan cu tin bestia y cu kier pa wordo steriliza, totalmente gratis, incluso nan ta facilita transporte si no tin, pa brinda e servicio di sterilizacion aki. Por manda un mensahe via e rednan social, pa inscribi, of via WhatsApp 593-8390.

Nan ta enfoca riba tur sorto di bestia, ya sea di caya, ya cu nan kier reduci mas tanto posible e pushi y cachonan cu tin riba caya, y cu ta biba na un manera masha cruel mes. “Nos kier traha duro riba esaki. E problema grandi ta e cacho y pushinan riba caya y kere, e  problematica di pushi ta mas grandi cu esun di cacho, pasobra pushinan ta bestia cu ta sali anochi. Por ta nos ta waknan hopi, pero nan tey”, Henriquez a señala.

El a agrega cu e fundacion a haya meldingnan tocante colonianan masha grandi mes, di pushi. “Di cacho tin asina hopi, pero di pushi masha hopi”, el a subraya.

“Eigenlijk, loke nos kier pidi comunidad ta si nan sa di un colonia, of un localidad cu tin asina hopi pushi y cacho por fabor melding cerca nos, nos ta wak si nan a wordo opera of steriliza caba, pero nos tin un lista cu nos ta pasando door di dje”, señora Henriquez a señala.