Activista ta señala retonan causa door di efectonan di e fenomeno El Niño

Activista climatico Oriana Wouters:

• Calor extremo y menos yobida
• Coral, fauna y hende lo sinti e impacto 

ORANJESTAD (AAN): Oriana Wouters, un activista climatico di Aruba, a indica den un entrevista cu DIARIO cu Aruba ya ta sintiendo e efectonan di e fenomeno climatico El Niño, cu a cuminsa entre fin di april y comienso di mei den Oceano Pacifico. Segun e, e fenomeno ta surgi ora awa profundo y sumamente mas cayente ta subi pa superficie di lama y posteriormente ta plama rond di oceano. Pa Aruba, esaki ta traduci den un clima mas seco, menos yobida y temperaturanan mas halto.

   Wouters a señala cu esaki ta representa un reto serio pa nos naturalesa. Specificamente, el a enfatisa e impacto riba e rifnan di Coral, cu ya ta sufri di diferente presionnan humano, incluyendo contaminacion door di awa di riool. Segun e, si na e situacion actual añadi un aumento di temperatura di entre dos y seis grado mas cu normal durante un periodo di por lo menos seis luna y posiblemente te un aña, e daño lo por bira ainda mas severo.

   Entre e consecuencianan ta e proceso conoci como bleaching, unda e coralnan ta perde nan color y debilita. Wouters a recorda cu Aruba ya a perde varios arecife den pasado door di malesanan di coral y impactonan relaciona cu retonan anterior di El Niño. El ta adverti cu probablemente lo mira mas di e efectonan aki den e añanan cu ta bin.

   Segun e activista, e impacto di El Niño no ta limita su mes solamente na lama. Riba tera tambe e fenomeno ta crea retonan significante. Door di e periodo di secura lo tin menos fruta disponibel, afectando bestianan cu ta depende di esaki pa nan alimentacion. Como resultado, hopi di nan por bira mas deshidrata y desorienta.

   E efecto tambe ta alcansa e ser humano. Esnan cu ta practica deporte regularmente, y trahadornan den construccion of otro profesionnan cu ta exigi trabao pafo, ta enfrenta un riesgo mas grandi di agotamento y problema relaciona cu calor extremo. Ademas, e productividad laboral por disminui significativamente door di e condicionnan climatico severo.

   Wouters a conclui cu e situacion ta confirma cu cambio climatico no ta un problema distante, sino un realidad cu ya ta afectando Aruba. El a enfatisa e importancia di proteha naturalesa, conserva awa y fortalece conscientisacion den comunidad tocante e impactonan di clima extremo. E reto ta grandi, pero cu accion y compromiso di comunidad, nos por fortalece nos resiliencia y proteha Aruba pa futuro generacionnan.