San Nicolas Pop-up Market den djis 6 luna a bira e mercado mas grandi di Aruba

Ministro Geoffrey Wever:

ORANJESTAD (AAN): Minister di Finansa, Asunto Economico y Sector Primario, Geoffrey Wever, ta anuncia cu e mercado mensual na Plaza Lolita na San Nicolas, e San Nicolas Pop-Up Market den seis luna di existencia,  a bira oficialmente e mercado mas grandi di Aruba.

   E cifranan ta papia pa nan mes. E mercado a cuminsa na september 2025 cu apenas 13 vendors. Awe, e ta conta cu casi 70 vendors activo. Y mas di 30 vendornan adicional ta riba e lista di espera pa participa.

E crecemento aki no ta un coincidencia. E ta e resultado directo di un vision claro y di trabao duro.

Minister Geoffrey Wever a enfatisa e significancia di e logro:

   "Ora cu nos a lansa e Pop-Up Market, nos a kere den e potencial di San Nicolas y den e potencial di nos productornan y empresarionan local. E cifranan di awe ta confirma cu nos pueblo tabata cla pa e oportunidad aki. Mas di 70 vendors activo y mas di 30 riba lista di espera, ta un señal convincente cu e economia local di San Nicolas ta despertando."

   Un papel crucial den e exito aki a wordo hunga door di e District Advisor di San Nicolas, Sr. Rondel Heyliger. Su dedicacion diario, su presencia den comunidad y su trabao operacional incansabel a haci posibel cu cada edicion a wordo ehecuta cu calidad y orden.

   "Rondel Heyliger a demostra con un lider comprometi y cerca di su comunidad por haci un impacto real. E ta e ehempel di e tipo di sirbido publico cu nos pueblo merece," segun Minister Wever.

E San Nicolas Pop-Up Market ta mas cu un mercado. E ta un motor economico. E ta creando ingreso pa famianan local. E ta brindando un plataforma na productornan y artesanonan local. Y e ta revitalisando e curason di San Nicolas.

   E iniciativa ta den linea directo cu e Programa di Gobernacion AVP-Futuro 2025-2028, cu ta pone prioridad riba crecemento economico duradero, fortalecemento di empresarionan chikito y revitalisacion urbano di San Nicolas como centro economico y cultural di nos isla.

   E mercado ta cece. E lista di espera ta crece. Y e confianza den nos economia local ta crece hunto cu ne. San Nicolas no ta para keto. San Nicolas ta avansando.

   Minister Geoffrey Wever ta invita tur residente y bishitante di Aruba pa sostene nos vendors local y pa biba di cerca e transformacion di San Nicolas.