Hof mester declara Otmar Oduber liber di e persecusion politico cu denuncianan falso

Abogado mr. Carlo y mr. Illes ta señala

ORANJESTAD (AAN): Diahuebs for di mainta te den oranan di atardi, e abogadonan di e sospechosonan Wever, Esser y Oduber a hiba nan defensa den e apelacion contra e sentencia di Januari 2025. Den e articulo aki ta concentra riba e defensa di e abogadonan di Otmar Oduber, mr. Carlo y mr. Illes.

   Persecusion politico cu denuncianan falso: E abogadonan a bisa cu e proceso di investigacion contra Oduber a dura mas cu 6 aña. Nan a mustra cu Oduber tabata minister entre 2017 y 2019. Na December 2019, Oduber a baha como minister y Marisol Tromp despues a haci denuncianan contra Oduber.

   E abogadonan a cuestiona cosnan no corecto cu a sosode durante e investigacion. Nan a mustra cu e sentencia di Corte den Promer Instancia ta un linea cora den e caso aki. E abogadonan ta haya cu tabatin violacion di e proceso husto di investigacion.

   Nan ta haya cu e miembronan di Landsrecheche tabatin interes pa colga Oduber. Na opinion di e abogadonan, e pruebanan a wordo haya den forma ilegal. Nan a mustra cu Fiscal a ordena investigacion sin cu tabatin denuncianan haci di entre otro Marisol Tromp y Jaime Croes, director di DIP e tempo ey.

Na September 2019 a cuminsa cu e investigacion, a basa di informacion di Bureau Crimineel Inlichting (BCI). Landsrecherche a cuminsa tap telefoon y haci investigacion na cas di Oduber. E abogadonan a señala cu e acusacionnan contra Oduber ta completamente diferente cu e informacionnan di BCI. Nan a cuestiona cu Landsrecherche no a averigua si e informacionnan ta confiabel promer cu a cuminsa investigacion.

   E abogadonan ta sospecha cu ta persecusion politico. Nan ta haya cu e tap di telefoon y investigacion na cas ta inhusto. Nan a mustra cu 18 Mei 2022, Hues Comisario corectamente a dicidi cu e informacionnan di BCI no ta suficiente pa prolonga detencion di Oduber. Despues Fiscal a presenta otro informacionnan di BCI pa hustifica prolonga di detencion di Oduber. E abogadonan a señala cu un hefe na BCI mes a declara durante interogacion cu ta hendenan politico a haci denuncia falso contra Oduber. E abogadonan ta considera esaki un violacion serio di e proceso husto di un caso.

   Venganza politico contra Oduber: E abogadonan ta haya cu e denuncianan di Marisol Tromp no ta confiabel. Nan a mustra cu 2 Juli 2020, Tromp como Minister a wordo invita pa Landsrecherche pa interogacion. A mustra Tromp riba su deber pa haci denuncia corecto. E abogadonan ta haya cu pa motibonan di venganza politico, Tromp a haci denuncia contra Oduber. Nan ta haya cu e denuncia di Tromp ta inconfiabel. Nan a mustra cu Tromp a haci denuncia riba trahadornan fantasma. Nan a mustra cu apesar cu Tromp a haya numbernan di Phillips, Tiel y Geerman, el a keda sin yama nan.

   Nan ta haya cu Tromp tabata gaña cu e no sa di Phillips y Tiel. Nan a cuestiona e hecho cu Tromp tabata nenga pa ricibi Phillips y Tiel pa reuni y despues tabata bisa cu nan no tabata presenta pa traha. E abogadonan a bisa Hof cu tin testigonan cu a bisa cu Phillips y Tiel tabata presenta na oficina y tabata traha.

   E abogadonan a bisa Hof cu Tromp a cambia e maneho di Oduber y despues a bisa Jaime Croes di DIP pa haci denuncia contra Oduber y e coordinador, e dama Wever. Nan a señala cu Fiscal a manda e denuncia pa Minister Presidente pa asina tuma medida contra empleado di DRH. E abogadonan a señala cu e tempo ey Tromp y Jaime Croes tabata sospechoso den caso Kukwisa.

   E abogadonan ta haya cu Hues di Corte den Promer Instancia no a tene tur e puntonan aki na cuenta. Nan a mustra cu Fiscal a hiba un fishing expedition pa asina colga Oduber caminda a keda sin scucha testigonan esencial di Oduber. E abogadonan a pidi Hof pa declara Procurador General (PG) no admisibel y tambe pa exclui tur e pruebanan haya door di e proceso di investigacion inhusto.

   Asunto di terenonan na Malmok: E abogadonan a cuestiona e evaluacion di Hues di Corte den Promer Instancia pa cu e dunamento di tereno na Malmok. Na opinion di e abogadonan, Hues no ta mustra kico tabata e delito cu Oduber y e dama Wever a haci cu e pasamento di tereno na e homber F. y dama C. E abogadonan ta haya cu Oduber y Wever a actua segun e maneho nobo di Oduber.

   Nan a bisa Hof cu tanto e director di DIP como Wever y otro empleadonan na DIP a confirma cu tin e maneho di “jong professionals” caminda esun cu tin e placa, ta haya tereno. Nan ta haya cu aki no tabatin malversacion. Nan no ta haya cu Oduber lo a instrui Wever pa kita e peticion di tereno di G. E abogadonan ta haya cu aki PG kier señala cu ta Oduber a faya y pa persigui’e. E abogadonan ta haya cu no tin prueba di sosten di e declaracion di Wever cu ta bisa cu Oduber a yam’e y bis’e cu mester hala e tereno di G. aden.

   E abogadonan a mustra cu Wever a bisa na Hues Comisario cu Oduber a bisa cu mester drecha e fayo haci cu dunamento di tereno. Nan a mustra cu Oduber no tabata envolvi den trahamento di carta pa G. pa hala tereno aden y reserva tereno di F. y C. Ta DIP tabata encarga cu esaki y finalmente Oduber ta firma ora cu tur cos ta cla. E abogadonan ta haya cu Oduber no ta complice di dunamento di tereno y tampoco cu el a haci mal uzo di su funcion.

   Trahadornan fantasma: E abogadonan a mustra cu por a mira durante tratamento di e caso, con a afecta Oduber cu e acusacion aki. Nan a señala cu Tromp ta esun cu a crea tur esaki como venganza pasobra el a wordo saca for di partido. Nan a mustra cu Phillips y Tiel tabata traha separa for di oficinanan di Gobierno. Tin 11 testigo cu a bisa cu Phillips y Tiel tabata traha. E abogadonan a bisa cu Phillips, Tiel y Geerman a haya contract via DHR.

   Nan a mustra cu Geerman tabata esun cu menos tabata mira na trabao y Oduber a wordo declara liber pa esaki. E abogadonan ta haya cu esey mester conta tambe pa Phillips y Tiel. Nan a señala cu Geerman a sigui traha cu Tromp. Abogadonan ta haya cu mester declara Oduber liber di e acusacion di trahadornan fantasma Phillips y Tiel.

   No tabatin mal uzo di funcion: E abogadonan a cuestiona e acusacion cu Oduber y Esser lo a haci mal uzo di funcion door di yuda hendenan haya trabao. Nan a mustra cu tin hendenan a declara cu no a priminti Oduber nada pasobra el a yuda nan haya trabao. Tin otro hendenan ta para riba cu nan no a cumpra Oduber. E abogadonan a mustra cu e logbook cu a haya di Esser, no tin nada di haci cu Oduber. Nan a mustra cu ningun director a bisa cu Oduber a pone presion riba nan pa tuma hende.

   Tur hende a sigui e procedura normal. E abogadonan ta haya cu Landsrecherche solamente a concentra riba e lista di Esser y whatsapp y no a check tur e otro solicitudnan cu tabatin pa trabao. Nan a remarca cu esey no ta un investigacion completo. E abogadonan a mustra cu Esser a bisa cu el a yuda yena papel pa hendenan y nada mas. E abogadonan no ta haya cu aki por papia di abusa di posicion y tampoco di a wordo cumpra.

   Abogadonan ta haya cu no tin ningun prueba contra Oduber. Nan a bisa cu Oduber ta un politico y PG no por prueba cu Oduber a haya beneficio di ningun hende. E abogadonan a pidi Hof pa declara PG no admisibel den e caso aki.