Un concentracion significante di stof di Sahara ta biniendo Aruba e siguiente tres pa cuater dia

Director di Meteo, Dave Barkmeyer:

ORANJESTAD (AAN) Den entrevista cu señor Dave Barkmeyer, director di Servicio Meteorologico di Aruba, a splica cu e no kier papa di “ola di calor” (heat wave) e momentonan aki, pasobra esaki ta mara na cierto condicionnan, un di nan ta, cu ta spera cu e calor lo mantene na temperaturanan mas halto cu normal, y e por bira un ola di calor, si.

   Esaki ta wordo sinti den diferente pais, pero, segun señor Barkmeyer,  e asunto ta cu nan tin diferente regla pa loke ta ‘heat wave’, entre otro, pero Aruba tin e diferente cu nan.

   “Nos ta un isla cu ta depende hopi di e biento cu ta supla, anto plus lama rond di nos.

   Mi no por bisa cu nos tin ‘heat wave’ pasobra e temperatura no ta subi na 33 of 34 grado, normal nos tin 32 grado, tin biaha 33 grado. Esey ta e temperatura normal, mi no ta papiando di e temperatura cu bo ta sinti, pasobra esey ta depende di unda bo ta. Bo por ta den sombra, of den un caminda cu bo ta haya hopi radiacion”, Barkmeyer a indica.

   El a agrega cu tin hende ta bisa cu e stof di Sahara tin di haber cu e biento persistentemente duro, cu ta stop di para. Y aworaki el a bolbe incrementa, y e proximo tres pa cuater dia, sigur Aruba lo haya un concentracion significante di stof di Sahara biniendo. Ya e prome parti a yega nos, pero falta un par di dia p’e pasa”, director di Meteo a comenta.

   Barkmeyer ta recomenta pa nos ciudadanonan keda informa riba e pronosticonan di tur dia cu Meteo ta  publica cu ta mas facil y dos bez pa dia.

   “Si tin algun cos straño e ta wordo publica direct riba dje, pero purba tene bo mes na haltura di e clima. Un horcan no ta bin di un dia pa otro. Tin e fasenan di formacion y desaroyo, y di mes bo ta haya sa kico ta kico. Si tin algun peligro pa e area nos lo anuncia di mes. Nos ta traha semper den combinacion di Rampenbureau”, señor Barkmeyer a indica. El a agrega cu e biento duro y e presion ambiental ta pone cu lama ta bira bruto, principalmente e partinan expone, no na parti noord so, pero e parti zuid tambe. “Mi ta pidi pa hendenan tene cuenta cu ne, principalmente awo cu e epoca di horcan ta bay drenta”, director di Meteo Dave Barkmeyer a relata.