DNM ta encurasha pueblo pa sigui planta y proteha e sortonan proteha di flora y fauna

Shahayra Croes di Directie DNM:

• Pa e siguiente generacionnan tambe por disfruta di nan 

ORANJESTAD (AAN)- Directie Natuur en Milieu (DNM) ta desea pa comunidad sa cual ta e sortonan di flora y fauna di Aruba, proteha den ley, pa nan laga esakinan caminda nan ta, y por tambe, pa sigui planta of proteha e sortonan aki, pa nan keda existi pa e siguiente generacion tambe por disfruta di nan, y wak e diferente especienan manera nos shoko y tur e turtuganan di laman, toteki, yiwana, etc., y tambe nos matanan proteha manera mata di Brasil, pal’i bonchi. Asina señora Shahayra Croes, Relacionista Publico, a sigui splica den entrevista cu DIARIO.

   E ta invita tur hende pa bay riba e website di DNM: dnmaruba.org. Anto riba e prome pagina bo ta haya database flora y fauna. “Nos ta categoriza esakinan den flora y fauna, y eynan bo ta haya e lista di tur e sortonan cu ta proteha”, Shahayra Croes a reitera.

   El a agrega cu DNM tin e maneho di medio ambiente y naturaleza, na unda tin diferente departamentonan di gobierno cu ta traha hunto, y ora ta trata di un tereno mas grandi cu 700 meter cuadra, e peticionario (esun cu ta bay desaroya e tereno) mester haci un peticion na DIP, unda cu DNM ta wordo envolvi pa bay wak cual ta e sortonan cu ta aparece riba e tereno, unda cu esun cu mester keda si ta yega na un comprondemento cuanto porciento mester keda unda cu esun proteha ta, pasobra eynan tin ta menos desaroya y otro parti cu si por wordo desaroya.

   “Nos ta haci un apelacion na comunidad y desaroyadornan di tereno pa respeta e sortonan proteha; si bo por haci un manera cu bo por traha rond di e sorto proteha, purba haci esaki, ta mas amical cu e matanan. Nos ta encurasha tur hende pa planta mas mata. Rond di Aruba nos sa cu tin hopi mata ta wordo kita, pero nos kier motiva nos habitantenan pa sigui planta, voraal si nan haya e semianan di esnan cu ta proteha”, señora Croes a subraya.

   El a comenta tambe cu DNM ta haya peticion di scolnan y di studiantenan, pa informacion na Papiamento, di e sortonan proteha. Nos ta wordo acerca tambe pa charlanan. Riba e website tin tur informacion di e bestianan, e matanan, unda investigadornan y amantenan di naturaleza bay sera conoci cu cual ta e sortonan di flora y fauna cu ta wordo proteha aki na Aruba”, PR di DNM, Shahayra Croes a enfatiza.