Hopi menor di edad ta wordo exponi na peligernan den eventonan grandi

Rubiella Toppenberg di FADA:

• Siguridad di nos muchanan ta cuminsa cu e decision di mayornan 

ORANJESTAD (AAN): Hopi mucha awendia no ta informa di e peligernan cu tin pa ta den eventonan na unda tin un grupo grandi di hende, den actividadnan nocturno specialmente pero tambe durante actividadnan of festivalnan cu ta tuma luga banda di lama. Den actividadnan aki tin hopi consumo di alcohol y droga cu facilmente por yega na nos muchanan. Banda di esaki, tambe tin otro actividadnan cu por haci hopi daño na e inocencia di nos muchanan.

   Rubiella Toppenberg di FADA, den un entrevista recien cu DIARIO a expresa cu ora algo malo pasa cu nos muchanan, mayornan kier culpa tur hende menos nan mes. Sinembargo, hopi mucha menor di edad (di 14 aña of mas young tambe), ta atende e actividadnan aki no acompaña pa un adulto. Hopi te hasta ta wordo baha door di nan propio mayornan.

   Mientras cu tur hende sa cu eyfo tin hopi hende cu menos bon intencion ta cana rond den e tipo di ambientenan aki, y ta busca esnan mas vulnerabel pa daña. Y ta e muchanan aki ta esnan mas vulnerabel. “Na final di dia ora algo bay robes, mayornan no por culpa niun otro hende pasobra ta mayornan ta tuma e decision pa baha su yiu menor di edad na e sitionan peligroso aki, sabiendo cu nan no por defende nan mes”, señora Toppenberg a expresa.

   Segun e, tampoco e muchanan aki no ta comprende di kico un evento asina grandi ta trata y di e peligernan real cu ta existi pasobra si nan tabata sa, nan lo no hacie. E educacion cu un mucha ta ricibi na cas ta fundamental pa siña nan con pa haci decisionnan mas sigur y evita lugarnan cu por pone nan na riesgo.

   Un problema hopi grandi ta, el a menciona, cu hopi mucha no ta wordo informa. E ta haya cu hopi mayor ta faya den informa nan yiunnan pa hiba nan den e caminda corecto. “E ta lamentabel. Tin mucho mucha den fiesta y concierto y hopi biaha no acompaña pa un adulto”, el a remarca.

   Esaki, segun señora Toppenberg, no ta problema di e mucha. Esaki ta responsabilidad di esun cu ta permiti e mucha frecuenta e actividadnan asina. E mes situacion ta wordo mira durante temporada di Carnaval, unda hopi mucha ta drenta eventonan manera lastlap sin supervision di nan mayornan of un adulto responsabel.

   “Esakinan ta situacionnan cu por tin consecuencianan hopi grave pa nos muchanan, sea mucha muhe of mucha homber. Mientras cu nan ta menor di edad, nan mester proteccion. Y e uniconan cu realmente por proteha nan ta esnan cu a trece nan na mundo,” señora Toppenberg a enfatisa.

   Proteha un mucha no ta solamente duna nan amor, sino tambe pone limite, guia nan, y tuma decisionnan cu ta garantisa nan siguridad. Pasobra un momento di negligencia por cambia un bida pa semper. FADA Aruba ta sigui traha activamente pa preveni situacionnan asina door di educacion, campañanan di concientizacion, orientacion pa mayornan y mucha, y apoyo na famianan, promoviendo un ambiente mas sigur unda nos hubentud por crece cu proteccion, informacion y guia adecua.”