Tur cos ta mustra cu Dolfijn cerca di Aruba ta recuperando

OANJESTAD (AAN): Prome Ministro Mike Eman a acudi atardi cerca boluntarionan di Aruba Marine Mammal Foundation y

Aruba Conservation Foundation a pasa gradici e boluntarionan cu tin algun dia ta cuida “Charlie”. E Pantropical spotted dolphin tin algun dia a keda atras riba nos lama.

   Te cu Diabierna merdia, e Dolfijn keto bay ta na bida.  Aunke tabatin varios speculacion circulando encuanto esaki.

   Un boletin oficial di Aruba Marine Mammal Foundation ta mustra cu e Dolfijn a cuminza recupera, y ta keto bay den e proceso di haya alimento.

   Tur cos a cuminza desde Dialuna ora cu a bin haya sa cu e Dolfijn aki no ta parce di ta bon di salud, y tabata buscando refugio den lama cerca di costa di e isla.  Pesey mes, boluntarionan siguiendo protocol a bin ta dune cuido y proteccion henter dia, pa dune e mihor chens posibel pa recupera di su malestar.

   Aruba Marine Mammal Foundation ta corda tur hende cu e Dolfijn aki no ta un atraccion of ‘chens di saca potret’.  Nan ta pidi specialmente tur operador di boto, jetski y seadoo pa mantene un distancia respetabel pa asina duna e boluntarionan un area calmo cu por yuda e Dolfijn ‘Charlie’ den su recuperacion.