Hof a bolbe pospone caso penal contra Nelson Speed de Andrade

Riba peticion di abogadonan nobo

ORANJESTAD (AAN): Diahuebs mainta un biaha mas, Hof di Corte Superior a pospone e caso di apelacion di Nelson Speed de Andrade, contra su condena di 18 December 2024. E abogadonan nobo mr. Carlo y mr. Illes a representa de Andrade e biaha aki y nan a haci e peticion pa pospone e caso por escrito y Diahuebs Hof a bisa cu ta honra e peticion. Na Februari 2026, mr. Canwood a pidi Hof pa pospone e caso pasobra de Andrade tabata den exterior.

   Sentencia di 18 December 2024: Hues den su sentencia, a cuminsa na bisa cu e ta declara tur cuater acusado: Koolman, Giel, Speed y Lacle liber di e acusacion di a forma parti di un organizacion criminal. Hues ta haya cu no tin suficiente prueba. Hues a sigui bisa cu Speed, Giel y Lacle ta culpable di a cumpra agente policial di fam Vos. Hues ta haya proba cu Speed, Giel y Lacle a paga polis Vos. Cada un a haci’e na nan manera. Hues a bisa cu e ta haya e declaracion di Vos confiabel.

   Na opinion di Hues, no ta esey so. E declaracion di Vos, ta wordo confirma door di e chatnan riba WhatsApp. Tin prestamo di placa haci y a duna regalo, pa asina move Vos como ambtenaar haci cosnan cu ta contra di su obligacion como agente di Polis.

   A viola obligacion di Vos: Hues ta haya tur cuater periodista culpable cu Vos a viola su obligacion di comparti informacionnan secreto di Polis. Hues a bisa cu Vos no a haci’e su so.

   E acusadonan a yuda door di duna diferente laptop computer, facilita aparato Wi-Fi, instalacion di cierto apps pa asina automaticamente tabata re-transmiti tur combersacion y informacion for di e Tetra-radio di Polis. Hues ta haya cu cada un a haci aporte significante den esaki.

   N por haci delito pa haya informacion: Hues a bisa cu pa cu e acusacion di organizacion criminal, no tin suficiente prueba di trahamento structural pa por papia di organizacion criminal. Pesey ta declara nan liber.

   Hues a reacciona riba defensa di abogado, cu mester tene cuenta cu libertad di prensa. Hues a bisa cu en principio mester respeta esaki pa democracia den un pais. Sinembargo, e limite di libertad di prensa ta wordo determina pa ley.

   Hues a enfatisa cu un periodista no por haci delito pa haya informacion. Hues ta haya cu esaki a sosode den e caso aki. El a bisa cu solamente den caso excepcional por tin excepcion.

   Pa cu e castigo, Hues a bisa cu e ta tene cuenta cu seriedad di e caso. E ta haya cu aki ta trata di un caso serio caminda a pone cu Vos a viola su obligacion y daña imagen di Polis. Esaki a crea duda den Polis door cu informacion secreto di Polis ta cay den man di e acusadonan. Hues ta haya cu esaki por causa peliger den comunidad.

   Hues a tuma e acusadonan na malo cu door di sensacion y nan propio interes a haci esaki.

   Castigo: E tempo ey, Hues a condena Speed na 18 luna di prizon di cual 12 luna ta condicional cu un tempo di prueba di 3 aña. Esey ta nifica cu Speed mester bay 6 luna cera den KIA. Hues a bisa cu Speed a haya mas castigo pasobra Speed a haci e delito aki den su tempo di prueba pa e mesun delito aki cu el a yega di haci den pasado.

   Apela Sentencia: Ta asina cu Speed a apela e sentencia y Diahuebs ta di dos biaha cu ta haci peticion pa pospone e caso. Hof a pospone e caso di apelacion pa dia 26 October 2026, caminda lo bay trata tur e caso di nobo y tres Hues lo bay dicidi si e castigo imponi ta na su lugar of no.