Wardacosta ta adverti tur doño di boto cu lama ta hopi bruto rond di islanan ABC

ORANJESTAD (AAN): Desde siman pasa caba, personal di Wardacosta di Caribe Hulandes a bin ta nota cu rond di Aruba, Bonaire, y Corsou tin biento ta suplando hopi mas duro. 

DIARIO mes a publica cu tin biaha rafaga ta yega te maximo 64 km/h.

   Ademas di esey, Wardacosta a mustra cu condicion di lama ta hopi mas bruto cu normal.  Pesey nan ta consehando tur hende pa den e dianan venidero bay ta mas cauteloso, y tene cuenta cu tempo actual y condicion di lama.

   Pesey nan ta suplica comunidad pa tene cuenta cu relatonan oficial di Departamento Meteorologico di Aruba (DMA), y demas instancianan oficial.  Fuera tene cuenta tambe cu:

(*) Evita riesgonan innecesario.

(*) No bay landa of nabega riba lama, excepto ora e ta necesario.

(*) Controla bo boto bon.

(*) Percura cu bo boto ta den bon estado y safe prome cu bo sali.

(*) Bay cu suficiente material di seguridad cu bo.

(*) Bisti e ekiponan necesario di seguridad, y percura cu tur cos ta abordo.

(*) Percura cu tur documento necesario y valido ta abordo.

(*) Semper informa un hende na tera, di bo ruta di nabega y ki ora bo ta regresa.

(*) Tene cuenta cu coriente fuerte di lama, olanan halto, y biento fuerte.

(*) Cualkier emergencia yama Wardacosta direct na 913.

(*) Bo seguridad y di otronan semper tin prioridad.