Castigo 26 luna prizon pa bendedor di droga y haya cu arma di candela

Acusado ta bisa Hues cu e ta uza marihuana den KIA

ORANJESTAD (AAN): E homber J.L.P. acusa di posesion di arma di candela y bende droga, a admiti di tabata bende y tabatin un arma di candela. El a hasta bisa Hues cu e ta uza marihuana den KIA. Hues a gradici J.L.P. pa su honestidad. Hues a condena J.L.P. na 26 luna di prizon di cual 6 luna ta condicional cu 3 aña di prueba. Durante e tempo di prueba J.L.P. lo cay bou guia di Reclassering pa asina e rehabilita di su adiccion na droga.

   Pistol: Recien tratamento di e caso a tuma lugar caminda Fiscal a acusa J.L.P. cu entre December 2024 y December 2025 e tabata bende droga y cu entre 1 Juni 2024 y 2 December 2025 e tabatin un pistol Beretta y cantidad di municion, esta bala di 9 mm.

   Segun J.L.P., el a cumpra e arma for di hende pa despues bende esaki. Sinembargo despues el a pensa cu si e bende e arma lo bin problema. Pesey el a keda cu e arma. Hues a bisa cu na Polis, J.L.P. a bisa cu e arma tabata un “pronkstuk”. J.L.P. a bisa Hues cu e tabatin e arma warda y pesey e tabata considera e arma un pronkstuk.

   Recidivista di Arma: Hues a puntra con hende ta bin ofrece arma na J.L.P. Segun J.L.P., e hendenan Venezolano for di kende e ta cumpra droga, a ofrece e arma. Fiscal a remarca cu anterior J.L.P. a wordo condena caba pa arma y tabata sa e consecuencianan. Pakico e ta bolbe busca arma. J.L.P. a admiti cu el a haci malo.

   Bende Droga: Hues a bisa cu tin indicacion cu J.L.P. tabata bende droga. Polis a detene un homber K. na un club nocturno, kende a bisa cu el a cumpra for di J.L.P. y a duna Polis e number di J.L.P. Asina Polis a cuminsa sigui WhatsApp di J.L.P. caminda ta mira hende ta puntra: “si tin snow”, “si tin cheiba”, “si tin wheat”, “si tin white”.

   Droga y Arma haya: Esaki a conduci na un investigacion na e cas unda J.L.P. ta biba. Esaki a sosode dia 2 December 2025, caminda Polis a haya 721 gram di marihuana, 354,9 gram cocaina y balansa. Tur e droga tabata den sakitonan. Polis tambe a haya den blafon di e cas scondi un arma di candela cu cantidad di bala. Hues a remarca cu normal esnan den droga, tin un arma di candela. Ademas tin un cantidad di testigo cu a bisa cu a cumpra droga for di J.L.P.

   Tur e droganan ta mustra cu J.L.P. tabata bende droga. J.L.P. a admiti di tabata yuda hende cu droga. El a bisa cu e ta uza marihuana y cocaina. El a bisa cu tur su conocirnan ta uza droga y e ta comparti cu nan pero a yega momento cu e no tabata comparti mas y tabata bende. J.L.P. a bisa Hues cu for tempo cu e tabata chikito, e tabata uza marihuana. El a bisa Hues cu tabatin un periodo cu droga tabata poco na Aruba y hendenan tabata bay cerca dje pa haya droga.

   Uza droga den KIA: Hues a remarca cu J.L.P. a yega di haya condena di 22 luna di prizon pa droga y arma di candela y pakico J.L.P. ta bolbe haci’e. Hues a puntra si J.L.P. no a pensa kico e tabata haci. Segun J.L.P., e problema ta cu e ta keda uza droga. El a admiti di ta adicto.

   El a bisa cu den KIA e sa haya marihuana. Hues a bisa cu e ta increibel pero e ta aprecia cu J.L.P. ta papia e berdad. J.L.P. a bisa cu e ta adicto y kier rehabilita

   Fiscal exigi 30 luna di Prizon: Fiscal a bisa cu e caso a cuminsa ora a detene e homber K. cu droga. K. a bisa cu el a cumpra droga for di J.L.P. Fiscal a sigui bisa cu investigacion a mustra cu e tabatin droga y Baretta cu 47 bala scondi den blafon.

   Desde 2024, J.L.P. tabatin e arma te December 2025 ora el a wordo deteni.  Fiscal a bisa cu tin prueba cu dos vez na Januari 2025, J.L.P. a bende cocaina. Tambe J.L.P. a admiti di tabata bende marihuana.

   Fiscal ta haya e caso serio. El a bisa cu droga ta causa hopi problema den comunidad. Tambe cu droga ta crea criminalidad. Fiscal a bisa cu e ta tene cuenta cu na 2021 a condena J.L.P. na 22 luna di prizon pa e mesun cos. Fiscal a exigi 30 luna di prizon pa J.L.P., di cual 6 luna ta condicional cu un tempo di prueba di 3 aña. Fiscal ta haya cu J.L.P. mester di ayudo pa su adiccion di droga. Fiscal ta kere cu lo ta bon pa laga Reclassering atende cu esaki. El a exigi tambe pa e droganan y e arma y e balanan wordo destrui.

   Abogado: mr. Illes a bisa Hues cu J.L.P. a admiti di a actua malo door di cumpra e pistol. Pa loke ta e droganan, e abogado ta haya cu esaki ta bendemento masha limita. El a bisa cu Polis a scucha J.L.P. casi 5 luna y a conclui cu J.L.P. no ta un bendedor grandi di droga. E abogado a bisa Hues cu J.L.P. kier haya ayudo pa su adiccion. E abogado ta haya e castigo exigi pa Fiscal na su lugar.

   Sentencia: Hues a sera tratamento di e caso y a dicta sentencia di biaha. Hues a bisa cu droga ta un problema grandi. J.L.P. ta forma parti di e circuito di droga. Esaki ta un caso hopi serio.

   Pa cu e castigo, Hues a bisa cu e ta tene cuenta cu anterior J.L.P. a wordo condena pa mesun cos y e ta bolbe haci mesun cos atrobe. Hues tambe a tene cuenta cu J.L.P. no tabata bende na grandi. Hues ta considera esaki, posesion di droga y arma di candela. Hues a tene cuenta cu J.L.P. a admiti di ta adicto na droga y ta yuda amigonan. Tambe Hues a tene cuenta cu J.L.P. kier ayudo.

   Hues a bisa cu e ta desvia un poco di exigencia di Fiscal. Hues a condena J.L.P. na 26 luna di prizon di cual 6 luna ta condicional cu un tempo di prueba di 3 aña. Hues a ordena pa J.L.P. cay bou guia di Reclassering durante e periodo di prueba pa asina J.L.P. por rehabilita di su adiccion.

   Hues a hala atencion di J.L.P. cu e ta duna J.L.P. un ultimo chens y awor den practica mester mustra cu J.L.P. ta den serio. Hues a bisa cu si J.L.P. bolbe cay pa droga, e ora ey por spera castigo pisa.