Negligencia di  hopi aña a causa cu nos careteranan ta den situacion deplorabel

Minister di Infrastructura Rene Herde:

*E no ta un problema di aña pasa y awo nos tin pa paga un prijs halto 

ORANJESTAD (AAN): “Nos cayanan ta den situacion deplorabel pa motibo di negligencia di mucho hopi aña”, asina Minister di Infrastructura Rene Herde a expresa den un entrevista recien. 

Segun el a menciona, nos tin un situacion echt critico na unda cu no tin un parti di Aruba cu no ta pidi pa drecha caminda y no solamente lapi nan. Tin un gran parti di nos isla unda nunca a haya asfalt incluyendo barionan completo. 

Minister Herde a indica cu presupuesto pa infrastructura, cu ta rond di 17 miyon florin, lo wordo inverti den nos careteranan. Lo destina parti pa asfalta e careteranan di santo y lo priorisa algun area cu ta wordo hopi uza, entre otro den zonanan turistico y barionan rond Aruba. 

Manera e mandatario ya a splica den reunion publico den Parlamento, tin den total 355 kilometro, ekivalente na 65%, di nos cayanan ta den mal estado. Segun e mandatario di infrastructura, Gobierno no por cubri esaki cu e 17 miyon florin cu Gobierno a aloca den e presupuesto di infrastructura. 

El a remarca cu Gobierno di Aruba ta trahando riba un plan, pa un periodo largo di entre 10 pa 15 aña, sin interupcion, inverti sumanan grandi, rond di 20 miyon pa aña, pa asina drecha loke tin atrasa y pa pone asfalt caminda no tin ainda. 

“Esaki ta un reto grandi pa balansa con nos ta bay uza e suma aki miho.  E no ta caba ni e aña aki ni otro aña. E no ta un problema di aña pasa pero pa hopi aña nos no a haci suficiente y awo nos tin pa paga un prijs halto”, Minister Herde a enfatisa. 

Minister Herde a remarca cu DOW tin un sistema pa cualifica calidad di caya. Esaki ta e sistema cu lo uza como base pa duna prioridad na e cayanan mas malo. Tambe lo tene cuenta cu careteranan cu ta mas frecuenta. “Tin cayanan cu ta den mal estado cu nunca a haya asfalt pero ta poco frecuenta. Mientras tin careteranan cu tin mas di 200 auto ta core pa dia. E combinacion aki di frecuencia y estado, ta bay hiba nos na e prioridad aki, sea ta pariba of pabou dib rug, esaki ta conta pa henter Aruba”, Minister Rene Herde a conclui.