A start trabao pa determina un ‘liña di pobreza’ y ‘poder di compra’ pa Aruba

Ministro Geoffrey Wever:

ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, den cooperacion cu Minister di Asuntonan Social, drs. Melvin Wyatt-Ras y Minister President mr. Mike Eman, a inicia oficialmente cu e trabaonan pa determina un definicion nacional di pobreza (“armoedegrens”) na Aruba y pa desaroya un sistema pa midi poder di compra (“koopkrachtmeting”). E proyecto aki ta wordo ehecuta bou liderazgo di Minister Wever, como minister encarga cu Centraal Bureau voor de Statistiek Aruba (CBS).

   E iniciativa aki ta marca un momento historico pa Aruba mustrando vision comparti y vision continua den beneficio di e habitantenan di Aruba. Den e prome periodo cu Minister Geoffrey Wever tabata minister, e tabatin atencion pa e necesidad di un definicion nacional di kico ta pobreza na Aruba y a cuminsa encamina e proceso pa cu esaki. For di Staten e topico di linea di pobreza a wordo treci dilanti den e contexto di cu no mester confundi bestaansminimum como linea di pobreza.

   Na 2024, riba peticion di Minister Geoffrey Wever, Commissie Bevolking en Ontwikkeling, forma e momento ey door di Centraal Bureau Statistiek (CBS) y Departamento di Asuntonan Social (DAS), como miembronan permanente di e commission, a duna conseho riba e topico aki na Minister Geoffrey Wever, como minister encarga cu CBS, y na Minister Rocco Tjong, como minister encarga cu asuntonan social y a dicidi di sigui e proceso pa por yega na un definicion nacional di pobreza na Aruba.

   Den cuadro di esaki Minister Geoffrey Wever a acerca Hulanda, por medio di Landspakket tema Economia, pa sondea e posibilidad pa pone e proyecto aki como parti di e Landspakket pa asina fortifica e desaroyo y monitoreo periodicamente di maneho social-economico di Aruba. Hulanda tabata dispuesto pa coopera den esaki. Riba peticion di Minister Geoffrey Wever Conseho di Ministro a bay di acuerdo pa añadi e proyecto aki na Landspakket tema Economia.

   Den 2025 e trabaonan pa traha e plan pa e proyecto (plan van aanpak) ‘De bepaling van de armoedegrens en koopkrachtmeting voor Aruba’ a tuma lugar door di profesionalnan di Aruba y Hulanda y na final di 2025 Minister Geoffrey Wever a presenta e ‘plan van aanpak’ ‘De bepaling van de armoedegrens en koopkrachtmeting voor Aruba’ na Conseho di Ministro di Gabinete AVP-FUTURO y Conseho di Ministro di Gabinete AVP-Futuro a bay di acuerdo cu e proyecto aki. Despues di esaki Minister Geoffrey Wever a haci entrega oficial di e ‘plan van aanpak’ ‘De bepaling van de armoedegrens en koopkrachtmeting voor Aruba’ na Hulanda. Awor, cu e kick-off meeting aki, e proyecto ta start y e trabaonan ta inicia. Hulanda a pone USD 340.000,- disponibel pa e proyecto aki y un experto tecnico di Centraal Bureau voor de Statistiek Hulanda lo asisti den e proyecto aki.

   E proyecto ta di sumo importancia pa desaroyo y monitoreo di maneho socio-economico. Durante e proyecto lo contesta e pregunta principal: Kico ta pobreza na Aruba? Pa contesta esaki mester defini e concepto pobreza y mester desaroya un metodo pa midi e prevalencia di pobreza pa Aruba periodicamente teniendo na cuenta cu, entre otro, e poder di compra y e desaroyo di poder di compra pa individuonan y hogarnan. Cu e proyecto aki lo por traha maneho mas enfoca riba e gruponan mas vulnerabel den nos comunidad door di brinda informacion obhetivo y concreto cu actualmente no ta disponible.

   Durante e proceso lo traha cu varios stakeholdernan local pa asina incorpora e contexto local y relevante den e definicion nacional di pobreza. E forma di traha aki tin como meta pa crea sosten amplio y pa tene cuenta cu informacion alcaso di nos sociedad pa e definicion final. Como parti di e cooperacion tecnico pa e proyecto, un experto di CBS Hulanda recientemente a yega Aruba y lo ta presente pa un periodo di un aña pa asisti cu implementacion di e proyecto.

   E proyecto ta consisti di tres componente principal:

(1) Determina e definicion di pobreza na Aruba.

(2) Desaroya un metodologia pa midi pobreza y poder di compra.

(3) Ancra e calculacion di pobreza na un manera structural na Centraal Bureau voor de Statistiek Aruba.

   Ta premira cu e proyecto lo wordo finalisa na 2027. Despues di esaki, Aruba pa prome biaha lo dispone di un sistema structural pa midi pobreza y monitorea e desaroyo di poder di compra.

   “Prioridad di maneho economico di Gabinete AVP-Futuro ta pa garantisa desaroyo economico cu participacion di tur hende. Ora nos sa na un manera oficial, structural y confiabel ken ta mas vulnerabel y con e desaroyo di poder di compra ta, como gobierno nos por implementa maneho cu ta mas directo y efectivo basa riba hechonan y data real,” segun minister Geoffrey Wever. “Esaki ta duna gobierno un miho bista y hermentnan mas efectivo pa combati pobreza na Aruba.

   Desde 2024 nos a implementa e “koopkrachtmodel” cu Economisch Bureau Amsterdam (EBA) a desaroya cual ta ser usa pa yuda traha y ehecuta maneho cu ta tene cuenta cu of mitiga e efecto di maneho riba e poder di compra. Cu e definicion di probresa na Aruba y un sistema pa midi e pobreza y poder di compra na Aruba di manera structural, Gobierno di Aruba ta dispone di mas herment cual ta aporta na bon gobernacion (‘good governance’).”

   Minister Wever ta gradici su colega Minister Wyatt-Ras, Minister Eman, Conseho di Ministro y tur stakeholders y partners nacional y internacional pa e cooperacion amplio rond di e tematica importante aki y ta desea Centraal Bureau voor de Statistiek Aruba, Directie Sociale Zaken Aruba, Departamento di Asuntonan Economico, Comercio y Industria Aruba, Dircetie Ouderenzaken, Centraal Bureau voor de Statistiek Hulanda y tur stakeholders hopi exito cu e proyecto historico pa determina un linea di pobreza y asina pone un fundeshi concreto pa maneho socio-economico cu ta contribui na un desaroyo economico inclusivo pa tur habitantenan di Aruba.