Diasabra 2 di mei lo tin exhibicion di hobennan na Museo Archeologico Nacional

Jo-ann Kock-Ridderstap

ORANJESTAD (AAN): Diasabra 2 di mei lo tuma luga un exhibicion di arte di hobennan riba teme di parhanan di Aruba. E expo lo tuma luga na Museo Archeologico Nacional Aruba (Mana) di 7 or pa 9 or di anochi y e entrada ta gratis. Señora Jo-ann Kock Ridderstap a duna di conoce cu esaki lo ta un anochi ameno na unda cu ademas di exhibicion di artenan, lo bay tin presentacion di poesia y musica.

   E proyecto aki ta parti di tres proyecto y e ultimo pa hobennan di edad entre 10 pa 18 aña, aunke tabata tin hobennan talentoso cu mas edad. Ambos prome proyectonan a bay super bon cu bon acohida di hobennan. E proyecto riba nos parhanan a basa tambe riba conscientisacion. E anochi aki lo purba pa cada hoben adopta un parha.

   Señora Kock-Ridderstap a remarca cu e biaha aki lo enfoca tambe riba diferente arte mixto, entre otro collage y Assemblage. Segun e, e hobennan cu ta participa, ta mehora cada biaha den nan arte y ta mas sigur di nan mes presentado nan arte cada biaha mas profesional.

   Despues di e ultimo proyecto aki, señora Kock-Ridderstap lo bay enfoca mas riba hende grandi despues di hopi peticion ricibi.

   Invitacion ta bay pa hobennan special pero pa Aruba en general, pa bishita e exhibidcion y alavez motiva e hobennan cu ta pinta y tambe ta conscientisa, diasabra awo, 2 di mei na Museo Archeologico Nacional Aruba.