Gobierno aki no tin vision pa solucion di Bubaliplas

Parlamentario Wever-Croes mirando cu no tin boluntad tampoco pa solucion

ORANJESTAD (AAN): “Despues di a pidi un reunion urgente den Parlamento 9 luna pasa, porfin a debati riba e molester di holor na Bubali y Parkietenbos. Lamentablemente, nos a topa cu un Gobierno cu no tin plan, no tin vision y cu no ta compronde e urgencia di e situacion aki”, lider di Fraccion di MEP, Evelyn Wever-Croes a duna di conoce.

   “Como e unico partido cu ta boga pa solucionnan real, nos a bay laga e solucion atras pa Gobierno actual. Sinembargo nan a scoge pa stop e plan y keda sin presenta un plan nobo. Unico posibel solucion cu Minister Dowers a presenta, ta pa pasa tuberianan di Bubali pa Parkietenbos, pa manda e sushi Parkietenbos.

   Nos a puntra con e tin pensa di pasa e tuberianan ey, si ta den cura di hende, of riba caminda; nos a puntra ki tempo esey ta keda cla, mirando cu e planta actual ta trahando demasiado riba su capacidad caba, y mester di solucion urgente; tambe nos a puntra cuanto e inversion aki lo sali, y con lo financia esaki. Ningun di e preguntanan aki a wordo contesta. Minister Dowers, e parlamentarionan di AVP y Futuro a scohe pa hunga weganan politico, yudando e minister pa e no mester a contesta. Mirando cu

   Fraccion di MEP no ta solamente cuestiona, pero tambe aporta cu solucionnan, nos a presenta un mocion pa obliga Gobierno bin cu un plan concreto den un plaso di 6 siman. Nos kier mira trabao, nos kier mira resultado. Sinembargo, den un acto di iresponsabilidad total, AVP y Futuro a scoge pa vota CONTRA. Door di nan falta di cooperacion, nan a lag’e bon cla cu nan ta prefera pleito politico prome cu e bienestar di nos hendenan.

   Aruba a keda sin e solucion cu e merece awe, pero nos di MEP no ta bay keda man crusa. Nos compromiso cu bo ta keda firme. Nos lo sigui na timon, poniendo presion y trahando, te ora e molester aki keda soluciona for once and for all.

   Aruba merece seriedad, y nos lo no stop te ora nos logr’e!” tabata e palabranan di Evelyn Wever-Croes.