Mayoria di hoben cu tin presion halto ta debi na mal comemento

Jasmira Mora, Coordinador POH

ORANJESTAD (AAN): Jasmira Mora, Coordinador Praktijkondersteuner Huisartsenzorg (POH) a elabora tocante e tema di presion arterial halto cerca hobennan.

Esaki, el a bisa, hopi biaha ta relaciona cu mal comemento.

El a subraya cu un hende hoben, en principio, su organonan ta jong, ainda su adernan ta jong y flexible, y no ta suppose di tin un problema di hipertension, alomenos cu e tin problema serio di presion halto den famia. Pero mayoria di caso ta e estilo di bisa no saludable, at all. Y tambe e falta di ehercicio.

E no ta un factor so, pero acumulacion di varios cos, y tin hoben cu riba esaki ta bebe alcohol y e tipo di cosnan aki ta keda agrega mas riba dje.

“Bo tin cu wak e cosnan aki na un edad hoben, ya cu maltrata nan curpa cual ta haci cu nan ta haya malesanan cu ta pa hendenan di edad mas grandi, cu nan curpa ta cansa, nan ta mas bieu y no ta trahando manera nan mester traha”, Jasmira Mora a splica.

Tambe t’asina cu nan no tin tempo di bay docter, nan no ta saca tempo pa haci esaki pasobra nan no ta sinti ningun problema di salud. Hopi biaha nan NO sa nan number. Pesey POH a bin cu e proyecto aki di sa “bo number” unda nan mes ta bin na pia di trabao unda e trahado no tin cu uza su tempo liber pero e dunador di trabao mes ta haci cu su empleadonan haya un chekeo di salud na pia di trabao.

“Mi ta aplaudi tur e instancianan cu ta haci esaki pa nan trahado pasobra na final di dia bo tin mas rendimento si bo tin hendenan saludable ta traha pa bo, cu si cada rato cu bo no ta atende cu ne, bo trahadornan ta keda meldziek”, Mora a subraya.