SMAC ta haci apelacion na gruponan di Carnaval pa keur tur vehiculo na tempo

Darren van Ommeren:

DTI ta coopera y ta habri dia diasabra 13 di december pa esaki 

ORANJESTAD (AAN): Carnaval ta den porta y e prome parada ta dia 3 di Januari 2026, esta Fakkel. Smac ta pidi pa tur grupo bay keur nan autonan prome cu e fecha aki. Presidente di Smac, señor Darren van Ommeren, den entrevista cu DIARIO a duna di conoce cu ya Smac a avisa y duna informacion na tur grupo di e procedura cu tin pa keur auto pa gruponan di Carnaval. DTI ta coopera cu Smac y gruponan di Carnaval y ta haci posibel pa diasabra dia 13 di december por keur vehiculonan cu ta den paradanan di Carnaval. 

El a splica cu gruponan mester haci afspraak of pasa personalmente na DTI y haci pago adelanta di e total di vehiculo cu lo mester keur y diasabra dia 13 di december                                                                                                                por pasa libremente na DTI keur. E dia aki, e caha lo no ta habri.

Tambe, van Ommeren a remarca cu, pa loke ta trata Polis, mester yama Departamento di Planologie na Balashi. Polis ta keur solamente largura, hanchura y haltura di entre otro trailers, trekkers. Pero banda di esaki, tur vehiculo mester bay keur na DTI.

Señor van Ommeren ta recorda tur grupo cu lo tin control di Polis den e parada dia 3 di januari y ta pidi pa tur hende pasa keur nan vehiculonan e siman aki pa asina evita problemanan ora e parada mester sali, pa no stroba e parada di sali na tempo y pa niun grupo keda afo.