Departamento Social a drenta den sistema digital pa su clientenan cuminzando cu bijstand

Director di DAS hunto cu su PR a anuncia “Loket Social”

ORANJESTAD (AAN)- Director di Departamento di Asunto Social (DAS), señora Glenda Hernandez, a yama un rueda di prensa Diabierna mainta, den cual el a anuncia cu DAS ta bay den e sistema digital cu su clientenan y bijstand.  Esaki lo bira conoci awor como “Loket Social”.

   Esaki ta e siguiente stap logra pa e Departamento, despues di un trabao di un aña y mey di e grupo interno y XA Technologies. Esaki ta nifica cu DAS ta bay online cu bijstand. Pa DAS esaki ta un gran logro, pa facilita e servicionan pa nan clientenan, y ta un meta cu nan tabata tin pa basta tempo caba.

Glenda Henriquez a menciona cu nan ta bay elabora con nan kier traha di awo pa dilanti. Si un persona kier pidi bijstand, nan ta bay defini con pa pidie, y esnan cu bisa “esaki si mi n' por” DAS tin un locket pa yuda e cliente yena e formulario, digitalmente. El a expresa cu e ta hopi orguyoso cu DAS a bay den e direccion aki.

   Seguidamente, Jesseline Soto-Garcia, Relacionista Publico di DAS a splica con e proceso aki ta cana. Despues XA Technologies tambe a hiba palabra.

   Loke ta Loket-Social:  Soto-Garcia a expresa cu esaki ta un gran dia pa Departamento di Asuntonan Social, cu despues di un aña y mey di a cuminza cu un proyecto cu, bon por bisa, cu Covid a pusha DAS mas y mas den dje, unda a tuma e decision di cuminza den forma digital cu e servicionan, pa asina facilita y brinda un miho servicio, na comunidad di Aruba.

   “Nos a cuminza, nos por bisa, cu e servicio di mas grandi di nos departamento cu ta e servicio di bijstand, pero e meta ta pa den futuro por sigui digitaliza e otro servicionan cu nos ta brinda, y asina tur hende via nos website por aplica pa un ayudo den un of mas di nos servicionan”, Jesseline a señala.

   El a splica kico e sistema di ‘Loket Social’ ta encera y kico ta bay cambia pa bijstand. El a menciona cu na 2020 Departamento di Asunto Social kier a lanza su website nobo: www.das.aw, pero lamentablemente, door di covid esey a wordo poni un banda, pasobra e no tabata algo cu nan por a bin hunto haci un evento grandi manera nan tabata kier; despues, bijstand a bin riba agenda y nan a schuif e website un banda.

   “Eigenlijk e ta un ‘2-in-1’. Nos ta menciona nos website unda cu nos clientenan y tur hende por haya hopi informacion di tur nos servicionan, y ken nos Departamento di Asunto Social ta. Anto via di e website aki e ta bay link bo pa e ‘Loket Social’ di bijstand”, Jesseline Soto-Garcia, PR di DAS a splica.