Homber haya cu plantacion di marihuana ta para riba cu e no a haci nada malo

The content originally appeared on: Diario

El a wordo condena na 2 luna di prison condicional

ORANJESTAD (AAN): Diahuebs mainta Corte di Husticia a trata e caso penal cu Ministerio Publico a cuminsa contra e homber J.C. El a wordo haya cu un plantacion di marihuana y Fiscal a exigi castigo condicional p’e. 

53 AÑA USANDO MARIHUANA

Durante tratamento di e caso, J.C. a bisa Hues cu e tin 53 aña ta usando marihuana. Ora Hues a bis’e cu plantacion di marihuana ta prohibi pa ley, el a bisa cu ni kico Hues haci lo no stop e di uza marihuana. El a bisa cu e no por stop di uza marihuana. El a bisa cu e no ta bobo ni loco y no kier ayudo tampoco. 

PLANTACION DI MARIHUANA

Hues a mustra cu Polis tabata patruya y a haya holor di marihuana. A bay haci investigacion na un cas y a haya un plantacion di marihuana. J.C. a cuestiona e forma con el a wordo deteni y hiba for di su cas. Hues a mustra cu e hecho cu Polis tabatin sospecho y a haya e 159 mata di marihuana, ta motibo pa a detene J.C. E no ta haya cu Polis a actua incorecto.

   J.C. a bisa Hues cu e ta usando marihuana pa 53 aña y cu e tin un plantacion pa su uso persona. El a splica cu e mata ta dura 6 luna pa ta adulto y produci e flor (cabez) cu ta wordo usa pa huma. El a bisa cu pesey e tin asina hopi planta pa asina e tin suficiente marihuana pa e por usa y cada 6 luna lo e tin produccion.

   Hues a bisa cu e no ta kere J.C. cu tur e plantacion ta pa su mesun uso. Hues a mustra cu segun e carchi di castigo, J.C. den pasado tabatin un caso caba di marihuana pero no a sigui esaki pasobra no tabata hopi marihuana. Esaki tabata na 2020. Pero na 2017, J.C. a yega di wordo condena caba pa plantacion. Na opinion di Hues, esaki ta duna indicacion cu J.C. no a siña.

   J.C. a bisa Hues cu ni kico haci, e lo no stop di uza marihuana. Hues a bisa cu segun ley, esey ta prohibi. Hues a bisa cu si e plantacion di marihuana ta contra ley, lo ta bon pa J.C. pensa di stop. J.C., basta altera, a bisa Hues pa dicidi si ta duna un boet of castigo di prison.

FISCAL

Fiscal a bisa cu J.C. ta bisa cu e no ta mira cu el a haci malo. Fiscal a mustra cu a base di ley, marihuana ta prohibi pasobra e ta fomenta criminalidad y ta malo pa salud. El a exigi 2 luna di prison condicional cu un tempo di prueba di 2 aña. 

ABOGADO

Abogado mr. de Sousa a bisa Hues cu J.C. ta un adicto na marihuana y a planta pa e tin cantidad pa e por uza. E abogado a bisa Hues cu el a constata cu J.C. ta uza marihuana pero ta na tino. E abogado a bisa Hues cu J.C. a bisa cu e no por sin marihuana. Na opinion di abogado, esey ta J.C. su moda di bida. El a sigui bisa cu e cantidad di mata ta hopi pero esey ta J.C. su forma di usa. E ta haya cu mester sali for di e punto di bista cu e marihuana ta pa propio uso y no pa bende. E abogado a bisa cu ta berdad cu marihuana ta prohibi pero el a pidi Hues pa tene cuenta cu J.C. su situacion. E ta haya e castigo un poco halto.
SENTENCIA

Hues a sera tratamento di e caso y a dicta sentencia di biaha. Hues a bisa cu segun procesverbaal di Polis, un patruya cu tabata coriendo y a haya holor di marihuana. A bay na e cas y a haci investigacion y a detene J.C. E ta haya cu esey ta corecto. Hues a bisa cu plantacion di marihuana ta contra ley. Hues a bisa cu e caso ta fastioso pasobra cu J.C. ta para riba cu ni kico haci e lo sigui usa marihuana. Hues ta puntra su mes si lo ta bon pa duna castigo condicional. El a bisa cu e motibo di castigo condicional, ta pa stop un hende. Pero J.C. ta bisa cu e ta sigui. Kico por haci awor? Na opinion di Hues, por bien ta cu J.C. lo por haya marihuana di un otro forma pero no plantacion. Hues ta haya cu no ta husto cu no ta duna castigo pa plantacion di marihuana, compara cu otronan si ta haya castigo.

   Hues a conclui cu e ta sigui Fiscal pa un castigo condicional pa stop J.C. haci plantacion. Hues a confirma e exigencia di 2 luna di prison condicional cu un tempo di prueba di 2 aña. Hues a duna orden pa destrui e matanan di marihuana y articulonan pa planta esaki. E rifle di aire confisca lo bay pa su doño.