Accion rapido di Zr.Ms Holland a logra intercepta 685 kilo di cocaina den Laman Caribe

ORANJESTAD (AAN): Warda Costa di Teritorio Caribense a informa cu Zr.Ms Holland a intercepta 685 kilo di cocaina den Laman Caribe.

E captura a tuma lugar diabierna 8 di November, pero a wordo anuncia dialuna. Esaki ta di 6 intercepcion desde cu e barco di marina Hulandes a yega Laman Caribe.

E avion di patruya di Warda Costa di Teritorio Caribense a mira un boto sospechoso mainta tempran. Zr.Ms. Holland a tuma accion inmediato y a sali rumbo pa e embarcacion sospechoso y a manda nan navenan di intercepcion rapido riba esaki.

E tripulacion di e FRISCs, scuadron di e Flota di Marina y un ekipo di aplicacion di ley maritimo di Warda Costa Mericano, a obliga e boto cu droga pa para. Finalmente esey a sosode despues cu a los tironan dirigi riba e motornan di e boto en cuestion.

Durante di e accion e tres traficantenan di droga tabata tira paketenan for di e boto. Tur e paketenan a wordo saca for di den laman y pone abordo di Zr.Ms. Holland. Na final, un total di 685 kilo di cocaina a keda confisca.

E sospechosonan y e droga a wordo entrega na Warda Costa Mericano. E traficantenan lo keda persigui na Merca.

-Barco di Stacion

Zr.Ms. Holland ta activo como barco di stacion den e teritorio di Laman Caribe for di inicio di September. Durante operacionnan anti-droga e barco ta opera den intercambio varia cu Warda Costa Mericano y Warda Costa Caribense.