Women’s Club of Aruba ta celebra su di 90 aniversario cu evento

ORANJESTAD (AAN):  Women’s Club of Aruba (WCA) ta invita bo pa un evento espectacular di fundraising pa celebra nan di 90 aña di existencia!

E evento cu tin como tema "Ready, Set, Bloom...!", ta promete di ta un atardi yena cu entretenimento, cuminda delicioso, y un super bon ambiente.

   Aki ta sigui e detayenan di nan fiesta. Fecha: Diadomingo, 29 di september 2024, cu horario: 3:00 - 7:30 pm, Localidad: Renaissance Convention Center, Dress code: Tropical Chic. 

   Durante e evento, tur presente lo disfruta di presentacion di musica di ‘N Fusion y Robert y su Solo Banda Show, cu lo duna ambiente di alegria y energia na e celebracion aki. E ticket ta inclui  un cena trempan y 4 bebida sin alcohol pa disfruta durante e fiesta.

    “Nos ta masha contento pa celebra nos aniversario cu un evento special cu ta reuni nos comunidad”, ta palabranan di Reina Geerman, presidente di WCA: “E no ta solamente un celebracion di nos 90 aña di servicio, pero tambe un oportunidad pa sigui apoya nos proyectonan local pa haci un impacto positivo riba Aruba”.

   A funda Women’s Club of Aruba na 1934 y nan organisacion ta dedica na trece cambio positivo den comunidad pa medio di proyectonan di boluntario y esfuersonan caritativo. E fondo cu ta recauda durante e evento aki ta pa yuda sostene e proyectonan aki, cu ta na beneficio di nos isla.

   No perde e oportunidad pa un atardi inolvidabel di musica y baile! Bin celebra 90 aña di servicio cu WCA y yuda nan continua cu nan trabou importante pa comunidad di Aruba.