The content originally appeared on:
Diario
Delegacionnan a cuminsa yega for di diabierna
ORANJESTAD (AAN): Presidente di Parlamento, Edgar Vrolijk a laga sa cu dialuna proximo lo sinta entre Aruba, Corsow, Sint Maarten y Surinam pa un reunion importante. Ya caba diabierna a yega Aruba un delegacion di Surinam y e delegacionnan di Sint Maarten y Corsow lo yega den weekend.
E reunion cu ta bay tin ta e ‘vierlandenoverleg’ cu ta algo cu ta existi caba pa basta tempo. El a stop. Pero awo e ta un bon comienso pasobra Surinam ta un pais di interes aworaki.
Ta bay trata diferente topico manera enseñansa, deporte, economia, turismo, aviacion, agricultura. Ministernan tambe lo tey presente, a remarca.
Nan ta esnan cu lo por tuma decision, pesey nan presencia ta hopi importante. Parlamento ta haci e contacto, pero e ministernan ta esnan cu mester duna siguimento, Vrolijk a splica.
Ta bay reuni henter dialuna te oranan di anochi. Banda di esaki ta bay prepara pa atende IPKO, a agrega.
Presidente di Parlamento a laga sa cu e topico di viahenan entre e islanan ta bay keda uno importante mirando cu for di basta tempo ta boga pa busca manera pa miho posibilidadnan pa haya vuelonan mas economico y mas conveniente.
“Nos ta bringa pa e solucionnan, pero na final di dia esey ta den man di gobierno. Nos ta crea e contacto, e mecanismo cu nan por yega na otro y asina purba yega na algo”, Vrolijk a expresa.
